"მთავარი არხის სატელევიზიო მაუწყებლობა დღეს საბოლოოდ შეწყდა", — ამის შესახებ მთავარი არხი გავრცელებულ განცხადებაში წერს. მათი თქმით, არხის "ერთ-ერთმა დამფუძნებელმა თავისი პირადი მიზნებისა თუ შურისძიების გამო დახურვამდე მიიყვანა მთავარი არხი და ამით დიდი სამსახური გაუწია რუსულ რეჟიმს".

მთავარი არხის მიერ გავრცელებულ განცხადებაში ნათქვამია, რომ ამ ეტაპზე მხოლოდ მთავარი არხის ციფრული დეპარტამენტი — სოციალური ქსელები და ვებ-გვერდი განაგრძობს მუშაობას.

"მთავარი არხის სატელევიზიო მაუწყებლობა დღეს საბოლოოდ შეწყდა.

5 წელი და 8 თვე აქ მთავარი იყავით თქვენ, ჩვენი მაყურებელი, ქართული საზოგადოება და ის ღირებულებები, რომლებიც ჩვენ ყველას გვაერთიანებს, რომლებმაც აქამდე მოგვიყვანა; ღირებულებები, რომელთა გაღრმავებითაც ჩვენ არა მარტო ევროპის, არამედ მთელი მსოფლიოს ღირსეულ წევრად უნდა დავრჩეთ და გადავრჩეთ; ღირებულებები, რომლებსაც ასე დაუნდობლად ებრძვის და ნაბიჯ-ნაბიჯ ანადგურებს ქართული ოცნება.

ჩვენც ძალიან ბევრი ვიბრძოლეთ. ჩვენი არხის არსებობა დაარსების დღიდანვე არ იყო მარტივი. ამ გზაზე გადავიტანეთ უამრავი გამოწვევა, რასაც ბევრი, უბრალოდ, ვერ გაუძლებდა. ბევრი წარმატებაც გვქონდა და არც შეცდომებისგან ვიყავით დაზღვეული, თუმცა მათი გამოსწორებისა და არხის მუდმივი გაუმჯობესებისთვის უმძიმესი კრიზისების დროსაც კი არ დაგვიკლია ძალისხმევა. დახურვის პირასაც არაერთხელ ვყოფილვართ ამ წლების განმავლობაში, მაგრამ მთავარი არხის თითოეული თანამშრომლის პირადი თავდადებით, თავგანწირვით და ერთგულებით, რიგითი ადამიანებისა თუ ჩვენი პარტნიორების გვერდში დგომით, ზოგჯერ თქვენგან ჩარიცხული თითო ლარით ან, უბრალოდ, გამხნევებით, მაინც ყველა ჯერზე გადავრჩით და წარმოუდგენელ ვითარებაში ვინარჩუნებდით საქართველოს ყველაზე გავლენიანი და რეიტინგული კრიტიკული არხის პოზიციას. იმდენად, რომ, ხშირად, თვითონაც კი გვიკვირდა საკუთარი მოთმინებისა და მიღწევების.

ჩვენ მართლაც შეუძლებელს გავუძელით, მაგრამ, როგორც ეს საქართველოს ისტორიაში, სამწუხაროდ, ბევრჯერ ხდება, ჩვენი ციხეც შიგნიდან გატეხეს, გარე მტერი ვერ მოგვერია. ჩვენ დაგვანგრია სწორედ იმან, ვინც, თავის დროზე, ამ აუღებელი კედლების აშენებაში გვეხმარებოდა. ჩვენმა ერთ-ერთმა დამფუძნებელმა თავისი პირადი მიზნებისა თუ შურისძიების გამო დახურვამდე მიიყვანა მთავარი არხი და ამით დიდი სამსახური გაუწია რუსულ რეჟიმს.

ამ ეტაპზე მხოლოდ ჩვენი ციფრული დეპარტამენტი — სოციალური ქსელები და ვებ-გვერდი განაგრძობს მუშაობას. სატელევიზიო მაუწყებლობის შესანარჩუნებლად ჩვენ არანაირი საშუალება აღარ დაგვრჩა.

დიდი მადლობა, რომ გვიყურებდით და გვისმენდით მთავარი არხის გუნდს, რომელიც ნებისმიერ ფასად აგრძელებდა თქვენთვის მუშაობას. კადრში თუ კადრს მიღმა, ჩვენ ისევ ძველი ღირებულებებით განვაგრძობთ ბრძოლას და ყველგან და ყოველთვის მთავარი იქნებით თქვენ, ქართველი ხალხი და ჩვენი საქართველო.

მომავალ შეხვედრამდე, — ნათქვამია გავრცელებულ წერილში.

მეტი "მთავარი არხის" შესახებ:

• 1 მაისიდან "მთავარი არხის" მაუწყებლობა სრულად შეწყდება — თანამშრომლებმა ოფიციალური შეტყობინება მიიღეს
• 15 თებერვლის დილიდან “მთავარი არხის” მაუწყებლობა შეჩერებულია
• "მთავარი არხის" ოპერატორი სერგი ბარამიძე მოსამართლე მანუჩარ ცაცუამ სამართალდამრღვევად ცნო და სიტყვიერი შენიშვნა გამოუცხადა
• ოქუაშვილი: "მთავარის" გადასარჩენად საჭიროა დირექტორად ჟურნალისტებისა და საზოგადოებისათვის მისაღები პირი მოვიდეს
• “მთავარი არხი” განცხადებას ავრცელებს სადაც წერს, რომ ოქუაშვილის დამაზიანებელი ქმედებების შედეგად მაუწყებლობას ვეღარ ახერხებს
• გიორგი ქურდაძე გაბუნიას თანამდებობიდან გადადგომის რეგისტრაციას ითხოვს
• "მთავარი არხის" ერთ-ერთი დირექტორი: ყველა ტყუილზე ვუპასუხებ შესაბამისი დოკუმენტებით
• ზაზა ოქუაშვილი: მე მზად ვარ, რომ ჩავერთო პირდაპირ ეთერებში, გიორგი გაბუნიას მიერ გაკეთებული განცხადებების საპასუხოდ, რათა საზოგადოებას ჰქონდეს სრულ ინფორმაციაზე წვდომა
• ნიკა გვარამია: ეს შანტაჟისტი გოგი, ცხადია ოქუაშვილის მითითებით და უკვე სრულიად დარწმუნებული ვარ ივანიშვილთან გარიგებით, არხს ფაქტობრივად ხურავს
• ზაზა ოქუაშვილი: ტელეკომპანიის დახურვაზე არც მიფიქრია
• გიორგი გაბუნია: ზაზა ოქუაშვილმა გადაწყვიტა, დახუროს "მთავარი არხი"
• მთავარი არხი: საჭიროა ქმედება ქართული საზოგადოების და დამოუკიდებელი მედიის დასაცავად