ლონდონში საგარეო საქმეთა მინისტრების დონეზე დაგეგმილი სამშვიდობო მოლაპარაკებები გადაიდო. The Guardian წერს, რომ ამის შესახებ ინფორმაცია დიდი ბრიტანეთის საგარეო საქმეთა სამინისტრომ გაავრცელა. მათი ცნობით, მოლაპარაკებები უკრაინის, აშშ-ის, დიდი ბრიტანეთის, გერმანიისა და საფრანგეთის სხვა მაღალი თანამდებობის პირებს შორის გაიმართება.

გამოცემა წერს, რომ გაერთიანებული სამეფოს საგარეო საქმეთა მინისტრი დევიდ ლემი დღეს ლონდონში უკრაინის სამშვიდობო მოლაპარაკებების ახალი რაუნდის მასპინძლობას ელოდა, რომელიც აშშ-ს, უკრაინასა და ევროპას გააერთიანებდა და ტრადიციულ მოკავშირეებს შორის ურთიერთობის შენარჩუნებას უზრუნველყოფდა, მაშინაც კი, როდესაც უკრაინის ომის დასრულების მიზნით აშშ-რუსეთის პირდაპირი მოლაპარაკებები გრძელდება.

თუმცა, ბრიტანელი მინისტრი გაწბილებულია აშშ-ის სახელმწიფო მდივნის, მარკო რუბიოს, სამშაბათს საღამოს მოულოდნელი გადაწყვეტილებით, რომ არ მიიღებდა მონაწილეობას მოლაპარაკებებში.

BBC წერს, რომ რუბიოს და უიტკოფის უარის მიუხედავად, ლონდონში მოლაპარაკებების მაგიდასთან იქნებოდნენ: დიდი ბრიტანეთის, საფრანგეთის, გერმანიის, უკრაინისა და აშშ-ის მაღალი თანამდებობის პირები, დიდი ბრიტანეთის საგარეო საქმეთა მინისტრი დევიდ ლემი უკრაინელ კოლეგასთან ორმხრივ შეხვედრას გამართავს.

ამასთან, უკრაინის პრეზიდენტმა ვოლოდიმირ ზელენსკიმ გამორიცხა ოკუპირებული ყირიმის რუსეთის ტერიტორიად აღიარება, მას შემდეგ, რაც გავრცელდა ინფორმაცია, რომ ეს შესაძლოა მოლაპარაკებებზე განიხილონ.

• WSJ წერს, რისი დათმობა შესთავაზა ტრამპმა უკრაინას ომის დასასრულებლად

ეს ყველაფერი Financial Times-ის რეპორტაჟის ფონზე მოხდა, რომლის თანახმადაც რუსეთი შესაძლოა მზად იყოს შეაჩეროს ომი უკრაინაში ყირიმზე რუსეთის სუვერენიტეტის აღიარების სანაცვლოდ.