საქართველოს მესამე პრეზიდენტისა და ოდესის ყოფილი გუბერნატორის, მიხეილ სააკაშვილის თქმით, ჩერნოვეცის სასტუმროს ნომერში, სადაც ის ცხოვრობდა, უკრაინის სპეცსამსახურები ფარული მიყურადების აპარატების დაყენებას ცდილობდნენ. ამის შესახებ მან ფეისბუკით განაცხადა:

"ისინი შემოსვლას ცდილობდნენ, მაგრამ დაცვამ არ შემოუშვა და შემდეგ ბოდიში მოიხადეს, ნომერი შეგვეშალაო. შემდეგ ისინი ჩემს დაბლა ნომერში ჩავიდნენ და, როდესაც ჩემი დაცვის თანამშრომლები უკან გაყვნენ, ისინი იმ ნომრიდანაც წავიდნენ, მაგრამ იქ ნივთები [ფარული მიყურადების აპარატი და აქსესუარები] დატოვეს."

სააკაშვილმა უკრაინის პრეზიდენტ პეტრო პოროშენკოს მიმართა და თქვა, რომ, როდესაც ის საქართველოს პრეზიდენტი იყო, სპეცსამსახურებს სხვისი პირადი ცხოვრების ჩაწერას უკრძალავდა:

"იცით, ბატონო პეტრო, ვიცი, რომ ჩემს ეთერებს უყურებ, იყო ასეთი შემთხვევა, როდესაც მტრის ჯაშუშის პირადი ცხოვრების ჩანაწერი მომიტანეს და მათ ამის გამოყენება სურდათ. მე ვუთხარი, სასწრაფოდ გაენადგურებინათ და ცხოვრებაში აღარასდროს ჩაეწერათ მტრების პირადი ცხოვრებაც კი."

საქართველოში ეს შენ გეხებამ! უკანონო ფარული მიყურადების წინააღმდეგ კამპანია ნაციონალური მოძრაობის ხელისუფლებაში ყოფნის დროს დაიწყო. მათ მიაჩნიათ, რომ უკანონო ფარული მიყურადება დღემდე მოქმედი ხელისუფლების პირობებშიც გრძელდება.

შინაგან საქმეთა სამინისტროს ინფორმაციით, 2013 წლის სექტემბერში გაანადგურეს 100-ზე მეტი კომპაქტური დისკი, რომლებიც 180-ზე მეტი საათის ხანგრძლივობის, უკანონო თვალთვალის გზით მოპოვებული, პირადი ცხოვრების ამსახველ ვიდეოჩანაწერებს შეიცავდა.