გერმანული მედია წერს, რომ გერმანიის კონსერვატიული პარტიები ზეწოლას აძლიერებენ კანცლერ ოლაფ შოლცზე ვადამდელი არჩევნების თარიღთან დაკავშირებით.

ქრისტიან-დემოკრატიული კავშირის ხელმძღვანელი ფრიდრიხ მერცი არჩევნების ჩატარების თარიღად 16 ან 23 თებერვალს განიხილავს.

როგორც გერმანული მედია წერს, ზეწოლის მიუხედავად, შოლცს არ სურს მთავრობის ნდობის შესახებ კენჭისყრის ჩატარება ბუნდესტაგში, რითიც შესაძლოა, გზა გაუხსნას ვადამდელი არჩევნების ჩატარებას.

შეგახსენებთ, რომ გერმანიის მმართველი კოალიცია რამდენიმე დღის წინ, 7 ნოემბერს მას შემდეგ დაიშალა — კანცლერმა ოლაფ შოლცმა, ეკონომიკურ რეფორმებთან დაკავშირებით უთანხმოების გამო, ფინანსთა მინისტრი კრისტიან ლინდნერი დაითხოვა.

კოალიცია კრიზისის წინაშე ლინდნერის თავისუფალი დემოკრატიული პარტიის (FDP) ულტიმატუმმა დააყენა — FDP შოლცის სოციალ-დემოკრატიული პარტიისგან და წვანეებისგან დათმობაზე წასვლას ითხოვდა ლიბერალური ეკონომიკური რეფორმების გატარების მიმართულებით, რაზეც მხარეები ვერ შეთანხმდნენ.

ლიდერების შეხვედრაზე შეთანხმების მიღწევა ვერ მოხერხდა, რამაც კოალიციის ერთიანობის გაგრძელება შეუძლებელი გახადა. ლინდნერმა მოუწოდა შოლცს, რომ ვადამდელი არჩევნები ჩაინიშნოს.

შედეგად, ოლაფ შოლცმა FDP-ის ლიდერი თანამდებობიდან გაათავისუფლა. მიუხედავად იმისა, რომ შოლცს პოტენციურად შეუძლია გააგრძელოს მართვა, უმცირესობაში დარჩენილი პარტია ბიუჯეტის დამტკიცებას ვერ შეძლებს, რაც დიდი ალბათობით, მარტის დასაწყისში ვადამდელ არჩევნებს ნიშნავს.