სელენა გომესი ინტერნეტსივრცეში უარყოფითი კომენტარების გავლენაზე საუბრობს და ამბობს, რომ ეს გამოცდილება განსაკუთრებით მძიმე ქალებისთვისაა. ამერიკელი მომღერალი და მსახიობი ცოტა ხნის წინ ერთ-ერთ პოდკასტში იყო სტუმრად თავის საქმროსთან, ბენი ბლანკოსთან ერთად. ბლანკომ აღნიშნა, რომ თავად არ ადარდებს, რას ფიქრობს ხალხი მასზე, მაგრამ გომესისთვის ეს საკითხი მარტივად გადასაჭრელი არ ყოფილა.

"უნდა აღვნიშნო, რომ ქალებს ბევრად საშინელ კომენტარებთან გამკლავება უწევთ", — ამბობს გომესი, — "ჩემი ხედვით, ეს ძალიან მწვავედ მოქმედებს. მგონი, არავისთვისაა სიახლე, რომ ქალები უფრო მძაფრად განიცდიან ყველაფერს — დაწყებული საკუთარი გარეგნობით, დამთავრებული იმით, თუ რა აცვიათ".

პოპვარსკვლავმა ასევე თქვა, რომ ინტერნეტში მის შესახებ დაწერილი კომენტარების გამო, მნიშვნელოვანი ღონისძიებებისთვის მორალურად მომზადება სჭირდება ხოლმე.

"როცა რაიმე ღონისძიებისთვის ვემზადები, დროის უმეტესი ნაწილი ვფიქრობ, იმედია, ფოტოს გადავიღებ და დავჯდები-მეთქი", — ჰყვება გომესი, — "ჩემი პერსონა ხომ ყოველთვის განსჯის ობიექტია — რომ საკმარისად თეთრკანიანი არ ვარ, რომ საკმარისად მექსიკელი არ ვარ...

"უამრავი რამ მიტრიალებს ხოლმე ცხვირწინ, რასაც თვალს ვერ ვარიდებ და ვნახულობ, ეს კი არაფერს გძენს, მხოლოდ უფრო გირთულებს ცხოვრებას. [განიხილავენ, მაგალითად] ვის ხვდები... კაცებზე ასეთი რაღაცები არავის აინტერესებს".

სელენას თქმით, მასზე ასევე იმოქმედა, რომ ბოლო პერიოდში ინტერნეტში "ყველა" მის წონას განიხილავს.

"ეს ძალიან მასევდიანებს — იმიტომ არა, რომ განვიცდი; უბრალოდ, ამან, თითქოს, უფრო გამაუხეშა. ვწუხვარ, მაგრამ ასეა".

ფოტო: Dimitrios Kambouris / Getty Images

ონლაინსივრცის მენტალურ ჯანმრთელობაზე გავლენის შესახებ გომესს აქამდეც არაერთხელ უსაუბრია. 2022-ში მან აღნიშნა, რომ ინტერნეტთან შეხება ოთხ წელზე მეტი ხნის განმავლობაში არ ჰქონდა, რამაც უფრო გააბედნიერა.

იმავე წელს გამოსულ დოკუმენტურ ფილმში Selena Gomez: My Mind & Me, სელენამ ასევე ისაუბრა, როგორ იმოქმედა ადრეულ ასაკში მოპოვებულმა პოპულარობამ მის ფსიქიკურ მდგომარეობაზე. შარშან კი პოპვარსკვლავმა აღნიშნა, რომ ნაწილობრივ სწორედ მენტალური ჯანმრთელობის მდგომარეობამ უბიძგა, არჩევანი გაეკეთებინა მუსიკასა და მსახიობობას შორის.

ასევე იხილეთ: