• დებატები დიდი ბრიტანეთის პარლამენტში:

დიდი ბრიტანეთის პარლამენტში ტვ იმედის წინააღმდეგ გამოძიების დაწყების საკითხი განიხილება.

ლეიბორისტული პარტიის დეპუტატმა და საგარეო ურთიერთობათა კომიტეტის წევრმა, ბლერ მაკდუგალმა დააყენა საკითხი, რომ ბრიტანეთის ეროვნულმა კრიმინალურმა სააგენტომ (NCA) დაიწყოს კომპანია Hunnewell Partners-ის იმ ოპერაციებთან დაკავშირებით გამოძიება, რაც საქართველოში პრორუსულ პროპაგანდასა და მშვიდობიანი მომიტინგეების წინააღმდეგ ძალადობის წაქეზებასთანაა დაკავშირებული.

ბლერ მაკდუგალის თქმით, საქართველოში "მშვიდობიანი მომიტინგეების ძალადობრივი დარბევა ხდება", ტელეკომპანია იმედი კი, "ამ სასტიკი მთავრობის მთავარი პროპაგანდის იარაღია და მუშაობს და იმართება დიდ ბრიტანეთში დაფუძნებული კომპანია Hunnewell Partners-ის მეშვეობით".

"საქართველოში მშვიდობიანი მომიტინგეების ძალადობრივი დარბევის გათვალისწინებით, მაინტერესებს, შესაძლებელია თუ არა გამონახოთ დრო ამ თემაზე დებატებისთვის, სადაც ვიმსჯელებთ იმ ფაქტზე, რომ ამ სასტიკი [საქართველოს] მთავრობის მთავარი პროპაგანდის იარაღი, მოქმედებს და იმართება დიდი ბრიტანეთიდან, კომპანია Hunnewell Partners-ის მეშვეობით.

მაინტერესებს, შეგვიძლია თუ არა ვიმსჯელოთ, დადგა თუ არა დრო ეროვნულმა კრიმინალურმა სააგენტომ (NCA) დაიწყოს კომპანია Hunnewell Partners-ის იმ ოპერაციებთან დაკავშირებით გამოძიება, რაც დაკავშირებულია პრორუსულ პროპაგანდასა და მშვიდობიანი მომიტინგეების წინააღმდეგ ძალადობის წაქეზებასთან", – განაცხადა ბლერ მაკდუგალმა

ლეიბორისტული პარტიის წევრმა და თემთა პალატის ლიდერმა, ლუსი პაუელმა მადლობა გადაუხადა ბლერ მაკდუგალს "ამ ძალიან მნიშვნელოვანი საკითხის წამოჭრისთვის" და თქვა, რომ ბრიტანეთის მთავრობა აგრძელებს საქართველოს მთავრობისთვის მოწოდებას, შეწყვიტოს დემოკრატიული ნორმებიდან გადახვევა და დასავლელი პარტნიორებისგან იზოლაცია.

"ბრიტანეთის მთავრობა აგრძელებს საქართველოს მთავრობისთვის მოწოდებას, შეწყვიტოს დემოკრატიული ნორმებიდან გადახვევა და დასავლელი პარტნიორებისგან იზოლაცია. ვგმობთ დემონსტრანტებისა და ჟურნალისტების მიმართ ძალის გადამეტებას. ვფიქრობ, ძალიან მნიშვნელოვანი საკითხი წამოჭრა [ბლერ მაკდუგალმა]. როგორც მე ვიცი, (ბრიტანეთის თემთა პალატის) Backbench-ის ბიზნესის საპარლამენტო კომიტეტის თავმჯდომარემ დღისწესრიგში დააყენა ჰოლდინგური კომპანიის საქმიანობაზე დებატების დაწყება, რაც ძალიან დროულია", — განაცხადა ლუსი პაუელმა.

• ბრიტანული კომპანია Hunnewell Partners-ის, ირაკლი რუხაძის და იმედის კავშირები:

შეგახსენებთ, რომ Hunnewell Partners-მა ტელეკომპანია იმედი 2021 წელს იყიდა. 2021 წლის 28 იანავრს Hunnewell Partners-ის (www.hunnewellpartners.com) პარტნიორ-დამფუძნებელი ირაკლი რუხაძე აცხადებდა, რომ მან და მისმა პარტნიორებმა იმედი ორი წლის წინ (2019 წელს) იყიდეს, მაგრამ სტრუქტურული მიზეზების გამო გადაფორმება გაჭიანურდა.

"მე და ჩემმა პარტნიორებმა ტელეიმედი ორი წლის წინ ვიყიდეთ. უბრალოდ, გადაფორმება გაჭიანურდა სტრუქტურული მიზეზების გამო. დღეს მივიღეთ ფორმალური თანხმობა კომუნიკაციების მარეგულირებელი კომისიიდან. რამდენიმე თვეში დავხურავთ გარიგებას და გამოვაცხადებთ. ტელეკომპანიას ჯერ ისევ ინა გუდავაძე ფლობს", — აცხადებდა Hunnewell Partners-ის დამფუძნებელ ირაკლი რუხაძე.

ტელეკომპანია იმედის ვებგვერზე ვკითხულობთ, რომ ირაკლი რუხაძე Hunnewell Partners-ის პარტნიორი დამფუძნებელია. 2018 წლამდე Hunnewell Partners-ი აქტივების მართვის მულტი იურისდიქციულ ორგანიზაციას წარმოადგენდა, რომელიც წარმოდგენილი იყო ოფისებით ლონდონში, მაიამიში, თბილისში, კიევში, მალაგაში და ბრიტანეთის ვირჯინის კუნძულებზე. ორგანიზაციის პარტნიორები მართავდნენ აქტივებს ამერიკის შეერთებულ შტატებში, დასავლეთ და აღმოსავლეთ ევროპასა და პოსტსაბჭოთა ქვეყნებში, ასევე მაღალი პროფილის მქონე პერსონების განსაკუთრებულად მაღალი ღირებულების აქტივებს.

საქართველოში Hunnewell Partners-ის პორტფელი წარმოდგენილია ქვეყნის უმსხვილესი და მაღალი ცნობადობის მქონე ორგანიზაციებით, როგორებიცაა მაგთიკომი, რუსთავის მეტალურგიული ქარხანა, ჰაიდელბერგ ცემენტი, ლიბერთი ბანკი, აიდიეს ბორჯომი და ტელე იმედი. ირაკლი რუხაძე ამ და სხვა კომპანიების სამეთვალყურეო საბჭოს წევრია როგორც საქართველოში, ისე სხვა ქვეყნებშიც.