ჰოლივუდის 400-ზე მეტი წარმომადგენელი აშშ-ის პრეზიდენტის ადმინისტრაციას ღია წერილით მიმართავს და ხელოვნური ინტელექტის (AI) კომპანიებისგან შექმნილ საფრთხეზე მიუთითებს. წერილით, რომელსაც რეჟისორები, მწერლები, მსახიობები, მუსიკოსები და ხელოვნების სფეროს სხვა წარმომადგენლები აწერენ ხელს, თეთრი სახლის მეცნიერებისა და ტექნოლოგიების განყოფილებას მოუწოდებენ, არ შეიცვალოს საავტორო უფლებების დაცვის პოლიტიკა.

აღნიშნული განცხადება მას შემდეგ გავრცელდა, რაც ცოტა ხნის წინ ტრამპის ადმინისტრაციას OpenAI-მ და Google-მა მიმართეს, სამართლებრივად დაშვებული გახდეს საავტორო უფლებების კანონით დაცული მასალის უნებართვოდ ან მფლობელისთვის კომპენსაციის გადახდის გარეშე გამოყენება თავიანთი AI ტექნოლოგიების გასაწვრთნელად.

"მიგვაჩნია, რომ აშშ შემოქმედებითი სფეროს დაზიანების ხარჯზე არ უნდა დაწინაურდეს AI ინდუსტრიაში", — ნათქვამია ხელოვანების წერილში, — "AI კომპანიები ითხოვენ, ეკონომიკურ და კულტურულ ძლიერებას ძირი გამოუთხარონ ფილმებზე, სერიალებზე, ნახატებზე, ნაწერებზე, მუსიკასა და ხმოვან ჩანაწერებზე საავტორო უფლებების დაცვის შესუსტებით, რათა მულტიმილიარდიანი კორპორაციებისთვის ტექნოლოგიები გაიწვრთნას".

წერილს ხელს აწერენ ისეთი ვარსკვლავები, როგორებიც არიან ქეით ბლანშეტი, პოლ მაკ-კარტნი, მარკ რუფალო, გილერმო დელ ტორო, სინთია ერივო, ბეტ მიდლერი, ბენ სტილერი, ობრი პლაზა და ტაიკა ვაიტიტი.

განცხადებაში ასევე ნათქვამია, რომ გუგლი და OpenAI, მაღალი შემოსავლის მიუხედავად, თავიანთი მოთხოვნით "ამერიკის შემოქმედებითი ინდუსტრიის შეუზღუდავად ექსპლუატაციისკენ" მიისწრაფვიან.

ფოტო: Analytics Insight

ბოლო პერიოდში ხელოვნური ინტელექტის შემოქმედებით ინდუსტრიასთან დაკავშირებამ ცხარე კამათი გამოიწვია. მაგალითად, წინა წლის დასაწყისში იაპონიაში ერთ-ერთი ყველაზე პრესტიჟული ლიტერატურული კონკურსის, აკუტაგავას პრემიის, გამარჯვებულმა განაცხადა, რომ წიგნი ხელოვნური ინტელექტის დახმარებით დაწერა, რასაც ინტერნეტში არაერთგვაროვანი გამოხმაურება მოჰყვა. ბერლინელმა ფოტოგრაფმა ბორის ელდაგსენმა 2023 წელს Sony-ის ფოტოკონკურსში ხელოვნური ინტელექტის გენერირებული სურათით გაიმარჯვა, მაგრამ პრიზზე უარი თქვა. ელდაგსენის თქმით, ამ ქმედებით მას საკითხზე დისკუსიის გამოწვევა სურდა.

ხელოვნური ინტელექტის მიერ ხელოვნების სფეროსთვის საფრთხის შექმნის პოტენციალით შეშფოთებულები არიან ცნობილი მწერლებიც. რამდენიმე მათგანმა, მათ შორის, ჯორჯ რ.რ. მარტინმა და ჯოდი პიკომ, 2023 წელს ერთობლივი დავაც წამოიწყო ChatGPT-ის შემქმნელი კომპანიის, OpenAI-ის, წინააღმდეგ.

მწერლების თქმით, კომპანია ენის მასშტაბური მოდელების შესაქმნელად უნებართვოდ იყენებს საავტორო მასალებს. ამასთან, 10 ათასზე მეტმა მწერალმა, მათ შორის ჯეიმზ პეტერსონმა და მარგარეტ ეტვუდმა, ხელი მოაწერა ღია წერილს, რომელიც ხელოვნური ინტელექტის ინდუსტრიას მოუწოდებს, სისტემების გასაწვრთნელად მათი ტექსტების გამოყენებამდე ნებართვა აიღონ და სათანადო კომპენსაციაც გადაუხადონ.