უკრაინის შინაგან საქმეთა მინისტრმა არსენ ავაკოვმა ფეისბუკზე დაწერა, რომ მცდელობის მიუხედავად, უკრაინის საზღვარზე პროვოკაცია მაინც მოხდა, სისხლი არ დაღვრილა, მაგრამ "საფასური იყო მაღალი":

"უკრაინის მხრიდან აქტივისტების მიერ საზღვრის გარღვევის დამამცირებელი "სურათი". უკრაინის საზღვარზე მდგარი ახალგაზრდა მესაზღვრისთვის ყელში წვდომა სიბნელეა. საქმე არაა პიროვნებებსა და კონფლიქტის არსში. ეს ინსტიტუციონალიზმის განადგურებაა. ეს ფუნდამენტების რღვევაა, რომელზეც დგას ქვეყანა... და თუ ეს ფუნდამენტები დაირღვევა, ნებისმიერი მიზეზით - ჩვენ არა სახელმწიფო, არამედ ტერიტორიაზე მაცხოვრებელი უღიმღამო ადამიანების მასა ვართ."

მისივე თქმით, მან მესაზღვრეებსა და პოლიციელებს აქციის მონაწილეების წინააღმდეგ იარაღი გამოყენება აუკრძალა.

როგორც უკრაინის შს მინისტრი წერს, უკრაინის საზღვრის გადაკვეთა იყო სახელმწიფოს საბაზო ინსტიტუციებზე თავდასხმა:

"არ გადაცვალოთ უკრაინა საკუთარ პოლიტიკურ მიზნებზე. მე და თქვენ დიდი ქვეყნის ისტორიის პატარა ნაწილები ვართ."

ავაკოვის თქმით, ყველა ის ადამიანი, რომელმაც საზღვრის გადაკვეთასა და მესაზღვრეებზე "თავდასხმაში" მიიღო მონაწილეობა, "კანონით დაისჯება":

"სააკაშვილმა და ყველა იმ ადამიანმა, ვინც საზღვარი გადაკვეთა, დაუყოვნებლივ უნდა აირჩიოს ორი ვარიანტიდან ერთი: შეგენის პუნქტში მისვლა და გაფორმების პროცედურების გავლა ან საიმიგრაციო სამსახურში გამოცხადება."

გუშინ, 10 სექტემბერს, საქართველოს ექს-პრეზიდენტმა და ოდესის ყოფილმა გუბერნატორმა მიხეილ სააკაშვილმა პოლონეთი-უკრაინის საზღვარი გადაკვეთა. ამ ფაქტზე ლვოვის ოლქის პოლიციამ გამოძიება უკვე დაიწყო.

სამართალდამცავების წინააღმდეგობის მიუხედავად, შეგინის სასაზღვრო პუნქტთან, უკრაინის ტერიტორიაზე მყოფმა სააკაშვილის მხარდამჭერებმა კორდონი გაარღვიეს, საკონტროლო-გამშვებ პუნქტში შეიჭრნენ და სააკაშვილი უკრაინის ტერიტორიაზე გადაიყვანეს.

მიხეილ სააკაშვილს უკრაინის მოქალაქეობა პრეზიდენტ პოროშენკოს გადაწყვეტილებით 26 ივლისს, ამერიკაში ვიზიტისას ჩამოერთვა. მიუხედავად ამისა, მას შემდეგ სააკაშვილი პოლონეთში, ლიტვასა და ბრიუსელში იმყოფებოდა. როგორც უკრაინის იუსტიციის მინისტრი იუწყება, საქართველომ უკვე მესამედ მიმართა უკრაინულ მხარეს სააკაშვილის ექსტრადიციის მოთხოვნით.