ინდონეზიელი ინფლუენსერი, რომელმაც ლაივ-სტრიმინგის დროს იესო ქრისტეს თმის შეჭრა ურჩია, ქრისტიანობის წინააღმდეგ სიძულვილის ენის გამოყენებაში დამნაშავედ ცნეს და ორი წლითა და 10 თვით თავისუფლების აღკვეთა მიუსაჯეს. ამბავს Amnesty International და ადგილობრივი გამოცემები ავრცელებენ.

როგორც ირკვევა, რატუ ტალიზას, მუსლიმ ტრანსგენდერ ქალს, რომელსაც ტიკტოკზე 450 ათასამდე გამომწერი ჰყავს, ერთ-ერთი ლაივ-სტრიმის დროს მაყურებელმა ურჩია, "თმა შეეჭრა და კაცს დამსგავსებოდა". ამის შემდეგ, ტალიზამ სტრიმში იესო ქრისტეს სურათი აჩვენა და თქვა: "ქალს არ უნდა ჰგავდე. თმა უნდა შეიჭრა და მამამისს [კომენტარის ავტორის მამას] დაემსგავსო".

ლაივ-სტრიმის დასრულებიდან მალევე, ქრისტიანულმა ჯგუფებმა პოლიციაში განცხადება შეიტანეს და ინფლუენსერი "მკრეხელობაში" დაადანაშაულეს. პოლიციამ კი რამდენიმე დღეში ტალიზა დააკავა.

სასამართლოზე თქვეს, რომ ტიკტოკერის გაკეთებულმა კომენტარმა შეიძლება გავლენა იქონიოს "საზოგადოებრივ წესრიგსა და რელიგიურ იდილიაზე", ამდენად, ინფლუენსერს პატიმრობა და ჯარიმა შეეფარდა.

Amnesty International-ის ადგილობრივი წარმომადგენლობა სასამართლოს გადაწყვეტილებას გამოხატვის თავისუფლებაზე თავდასხმად აფასებს. მათი თქმით, რელიგიური შუღლისა და დისკრიმინაციის გაღვივება უნდა იკრძალებოდეს, მაგრამ ტიკტოკერის კომენტარი ასეთ ქმედებად ვერ შეფასდება.

ინდონეზია მსოფლიოში ყველაზე მრავალრიცხოვანი მუსლიმური ქვეყანაა, სადაც ზრდასრული მოსახლეობის 93 პროცენტი ისლამის მიმდევარია. ბოლო წლების განმავლობაში, ქვეყანაში არაერთი ადამიანი დაადანაშაულეს "მკრეხელობაში". რელიგიური კონსერვატიზმის მომძლავრების ფონზე კი, უფლებადამცველი ორგანიზაციები ხაზს უსვამენ, რომ "მკრეხელობის" შემზღუდავი კანონი ხშირად გამოიყენება უმცირესობების წინააღმდეგ.