"ყველა ხელისუფლებას მოვუწოდებ, მიხედოს თავის ქვეყანას, სადაც მათ აქვთ ძალიან დაბალი მხარდაჭერა", — ასე გამოეხმაურა ოცნების პარლამენტის თავმჯდომარე, შალვა პაპუაშვილი ევროპის საკითხებში საფრანგეთის მინისტრის, ბენჟამინ ჰადადის განცხადებას იმის შესახებ, რომ საქართველოში კრიზისიდან გამოსავალი შეიძლება ახალი არჩევნები იყოს.

"ვხედავთ, რომ ზოგიერთს უცხოეთში საკუთარი სურვილები ეშლება რეალობაში. ის, რაც მათ სურთ დაინახონ, რასაც ისინი აქეზებენ და მხარს უჭერენ, უნდათ, რომ იყოს რეალობა. ქართველი ხალხი სინამდვილეს ხედავს მიუხედავად იმისა, რომ არის მცდელობა, სრულად გარედან წახალისებული ძალადობით, რადიკალიზმის ტალღა, რომელიც მათ სურთ დააორგანიზონ, ეს არ გამოდის.

საფრანგეთის მოქალაქეების 61% მოითხოვს საფრანგეთის პრეზიდენტის გადადგომას, ხოლო 50%- სურს ახალი საპარლამენტო არჩევნები საფრანგეთში, ამიტომ ყველა ხელისუფლებას მოვუწოდებ, მიხედოს თავის ამომრჩევლებს და თავის ქვეყანას, სადაც მათ აქვთ ძალიან დაბალი მხარდაჭერა. ნუ შეწუხდებიან სხვა ქვეყნების შიდა საქმეებში ჩარებით," — თქვა პაპუაშვილმა.

მანამდე ჰადადიმ ფორმულასთან განაცხადა, რომ ქართული ოცნება "ქართველებს ევროპული გზისგან აშორებს".

"ვფიქრობ, რომ ახალი არჩევნები შეიძლება, იყოს კრიზისიდან გამოსვლის გზა. ჩვენ გამოვდივართ ინკლუზიური დიალოგის მოწოდებით, რომელშიც გათვალისწინება იქნება ოპოზიცია და ქართველი ხალხის ევროპული მისწრაფებებისადმი პატივისცემა, რომელიც უარს იტყვის ნებისმიერი სახის ძალადობაზე, განსაკუთრებით მშვიდობიანი დემონსტრანტების წინააღმდეგ

ძალიან შეშფოთებული ვიყავით არალიბერალური ტენდენციის გამო. ამას ვეუბნებოდით ქართულ ოცნებას არამხოლოდ ბოლო თვეების, არამედ ბოლო რამდენიმე წლის განმავლობაში, სამწუხაროდ, რომ ის ქართველებს ევროპული გზისგან აშორებს", — თქვა ევროპის საკითხებში საფრანგეთის მინისტრმა, ბენჟამინ ჰადადმა "ფორმულასთან" საუბრისას.