თეატრალური უნივერსიტეტის სტუდენტური მოძრაობის წევრები წერენ, რომ მათ ნაწილს უნივერსიტეტის ეთიკის კომისიამ სტუდენტის სტატუსი შეუწყვიტა.

"დღეს პროტესტში მყოფი სტუდენტების ნაწილს მოგვივიდა მეილი უნივერსიტეტის ადმინისტრაციისგან, რომელიც იუწყება რომ სტუდენტის სტატუსი შეგვიწყდა", — წერენ სტუდენტური მოძრაობის გვერდზე სოციალურ ქსელში.

სტუდენტები სოციალურ ქსელში წერილს აქვეყნებენ სადაც წერია, რომ სტუდენტებს გადაწყვეტილების გასაჩივრება 3 სამუშაო დღის განმავლობაში რექტორთან წერილობითი მიმართვის საფუძველზე შეუძლიათ.

"როგორც თქვენთვის ცნობილია, გაიმართა ეთიკის კომისიის სხდომა, სადაც განხილული იყო სტუდენტების მხრიდან უნივერსიტეტის ეთიკის კოდექსით გათვალისწინებული ნორმების დარღვევის საკითხი. გაცნობებთ, რომ ეთიკის კომისიის გადაწყვეტილებით, თქვენ შეგიწყდათ სტუდენტის სტატუსი", — წერია შეტყობინებაში, რომელიც სტუდენტებმა ადმინისტრაციისგან მიიღეს.

NEWS.On.ge ფაქტის გადამოწმებას უნივერსიტეტის ადმინისტრაციასთან ცდილობს.

შეგახსენებთ, რომ დღეს, 19:00 საათზე ილიაუნის “ა” კორპუსში სტუდენტური მოძრაობა დაუმორჩილებლობის აქციას გამართავს. ამის შესახებ ინფორმაციას ილიაუნის სტუდენტური მოძრაობა ავრცელებს. ისინი წერენ, რომ არ ცნობენ არალეგიტიმური ხელისუფლების დრაკონულ კანონებს, თავიანთი სივრცის გამოყენებისთვის კი ნებართვა არ სჭირდებათ.