უკრაინის პრეზიდენტი ვოლოდიმირ ზელენსკი X-ზე ბრიუსელში გამართულ ევროპის ლიდერების საგანგებო სამიტის შესახებ წერს.

ზელენსკი თქმით, სასარგებლო შეხვედრები გამართა ევროპის საბჭოს პრეზიდენტ ანტონიო კოშტასთან და ევროკომისიის პრეზიდენტ ურსულა ფონ დერ ლაიენთან, საფრანგეთის პრეზიდენტ ემანუელ მაკრონთან, ბელგიის პრემიერმინისტრ ბარტ დე ვევერთან და ავსტრიის კანცლერ შტოკერთან. ზელენსკი წერს, რომ მნიშვნელოვანი შეხვედრა ჰქონდა NATO-ს გენერალურ მდივან მარკ რუტესთანაც.

უკრაინის პრეზიდენტმა განცხადებაში ასევე დაადასტურა, რომ დაგეგმილი აქვს საუდის არაბეთში ჩასვლა და მისი გუნდი, სამშვიდობო მოლაპარაკების ფარგლებში, ამერიკელ პარტნიორებთან ერთად მუშაობას გააგრძელებს.

ზელენსკის თქმით, NATO-ს გენერალურ მდივანთან მან "სწრაფი გზით მშვიდობის მიღწევის" გეგმა წარადგინა, რომელიც "ცასა და ზღვაზე მშვიდობაზე" სრულ კონტროლს გულისხმობს. პრეზიდენტმა ასევე დასძინა, რომ ეს გეგმა "შავი ზღვის რეგიონში საბრძოლო მოქმედებების შეწყვეტას და უსაფრთხო საზღვაო მიმოსვლის უზრუნველყოფას გულისხმობს".

"წარვადგინე ხედვა იმის შესახებ, რომ სწრაფი გზით მშვიდობის მიღწევა შესაძლებელია.
ჩვენ, პარტნიორებთან ერთად, ვაცნობიერებთ, თუ რა ნაბიჯებია საჭირო ომის შესაჩერებლად, უსაფრთხოების უზრუნველსაყოფად და ღირსეული, გრძელვადიანი მშვიდობის დასამყარებლად. ახლა შესაბამისი პრაქტიკული წინადადებების მომზადებაზე ვმუშაობთ.

პირველ ეტაპზე, შესაძლებელია სრულად გაკონტროლებული "ცის სიმშვიდის" დამყარება — რაც გულისხმობს რაკეტებისა და შორი მოქმედების დრონების თავდასხმების შეწყვეტას ენერგეტიკულ და სხვა სამოქალაქო ინფრასტრუქტურაზე. ასევე, "ზღვის სიმშვიდე", რაც შავი ზღვის რეგიონში საბრძოლო მოქმედებების შეწყვეტას და უსაფრთხო საზღვაო მიმოსვლის უზრუნველყოფას გულისხმობს.

ჩვენ ამ ნაბიჯებს განვიხილავთ, როგორც ფართომასშტაბიანი და ყოვლისმომცველი დარეგულირების დასაწყისს. ომი უნდა დასრულდეს რაც შეიძლება მალე, და უკრაინა მზადაა მშვიდობის დასამყარებლად ამერიკასა და ევროპასთან ერთად 24/7 რეჟიმში იმუშაოს.

მომავალი კვირის ორშაბათს ვგეგმავ ვიზიტს საუდის არაბეთში მემკვიდრე პრინცთან შეხვედრისთვის. ამის შემდეგ, ჩემი გუნდი საუდის არაბეთში დარჩება ამერიკელ პარტნიორებთან მუშაობისთვის. უკრაინას ყველაზე მეტად მშვიდობა სჭირდება.

როგორც პრეზიდენტ ტრამპს ვუთხარით, უკრაინა მოქმედებს და იმოქმედებს მხოლოდ კონსტრუქციულად, რათა სწრაფად და საიმედოდ დამყარდეს მშვიდობა," — განაცხადა ზელენსკიმ.

შეგახსენებთ, რომ Fox News-ის ცნობით, 11 მარტს ამერიკისა და უკრაინის დელეგაციები საუდის არაბეთის ქალაქ ერ-რიადიში მოლაპარაკებებს გამართავენ. ჟურნალისტის ცნობით, საუდის არაბეთის დედაქალაქ ერ-რიადში უკრაინულ მხარესთან შესახვედრად ჩავლენ აშშ-ს სახელმწიფო მდივანი მარკო რუბიო, ახლო აღმოსავლეთში აშშ-ს პრეზიდენტ დონალდ ტრამპის სპეციალური წარმომადგენელი სტივ უიტკოფი და ეროვნული უსაფრთხოების საკითხებში თეთრი სახლის მრჩეველი მაიკ უოლცი.