ნეტგაზეთისა და ბათუმელების უკანონოდ დაკავებული თანადამფუძნებელი და დირექტორი, მზია ამაღლობელი პატიმრობაში რჩება. გადაწყვეტილება ბათუმის საქალაქო სასამართლოს მოსამართლე ვიქტორ მეტრეველმა მიიღო.

ბათუმის საქალაქო სასამართლოს მოსამართლე ვიქტორ მეტრეველმა დააკმაყოფილა პროკურორების — შოთა ჩხაიძისა და თორნიკე გოგეშვილის მოთხოვნა აღკვეთის ღონისძიების სახით პატიმრობის გამოყენების გადაწყვეტილების ძალაში დატოვების შესახებ.

პროკურორები ამტკიცებდნენ რომ გათავისუფლების შემთხვევაში, მზია ამაღლობელი, შესაძლოა, მიმიმალულიყო ან სავარაუდო დანაშაული განმეორებით ჩაედინა. დაცვის მხარის პოზიცია იყო, რომ მზია ამაღლობელი დაუყოვნებლივ, დარბაზიდანვე უნდა გათავისუფლებულიყო.

სხდომის დასაწყისში, მოსამართლის კითხვაზე, ცნობს თუ არა თავს დამნაშავედ წარდგენილ ბრალდებაში, მზია ამაღლობელმა უპასუხა, რომ თავი უკანონო პატიმრად მიაჩნია.

"არ ვეთანხმები ბრალს. უკანონო პატიმრად მივიჩნევ თავს. საბედნიეროდ, ჩვენს სამშობლოში დიქტატურამ საბოლოოდ ფეხი ვერ მოიკიდა. ამიტომ, მჯერა, მეც და სინდისის პატიმრებიც შევძლებთ ჩვენი უდანაშაულობის დამტკიცებას", — განაცხადა მზია ამაღლობელმა.

ასევე იხილეთ:

მზია ამაღლობელის საქმეს პოლიციელის პატაკი დაერთო, რომლის მიხედვითაც ჟურნალისტი პოლიციელზე თავდასხმას სხვებთან კომუნიკაციით გეგმავდა