ბათუმის საქალაქო სასამართლოში ბათუმელებისა და ნეტგაზეთის დირექტორის, მზია ამაღლობელის წინასასამართლო სხდომა მიმდინარეობს, სადაც ცნობილი გახდა, რომ ჟურნალისტის საქმეში 15 თებერვალს შედგენილი პატაკი დევს, რომლის მიხედვითაც ამაღლობელს დაგეგმილი ჰქონდა პოლიციელზე თავდასხმა და მითითებებს ტელეფონიდან იღებდა. ამის შესახებ პუბლიკა წერს.

პროკურატურა ამ პატაკის საფუძველზე ამაღლობელის ტელეფონიდან ინფორმაციის ამოღებას ითხოვს.

მზია ამაღლობელის ადვოკატები მოითხოვენ არ დაკმაყოფილდეს დეტექტივს ჩვენება და საქმეს არ დაერთოს ჟურნალისტის ტელეფონიდან ინფორმაციის ამოღების მოთხოვნა.

ამაღლობელის ერთ-ერთმა ადვოკატმა, ჯუბა ქათამაძემ სასამართლო სხდომაზე განაცხადა, რომ დეტექტივი ვლადიმერ ჩიტაია პატაკში მოყვანილი ინფორმაციის საფუძვლიანობას მხოლოდ იმით ადასტურებს, რომ "მან ასეთი ინფორმაცია მიიღო".

"2025 წლის 15 თებერვლის პატაკით გურიის პოლიციის დეპარტამენტის დეტექტივების ოპერატიული სამმართველოს დეტექტივმა ვლადიმერ ჩიტაიამ გურიის პოლიციის დეპარტამენტის დირექტორის მოადგილეს, სერგი ჟღენტს მიაწოდა ინფორმაცია იმის შესახებ, რომ მზია ამაღლობელს წინასწარ ჰქონდა დაგეგმილი პოლიციელზე თავდასხმა, რის შესახებაც მობილური ტელეფონის საშუალებით კომუნიცირებდა მისთვის დაუდგენელ პირებთან და აღნიშნულის შესახებ ელექტრონული ინფორმაცია უნდა ინახებოდეს მზია ამაღლობელის მობილურ ტელეფონში. აღნიშნულ პატაკში მოყვანილი ინფორმაციის საფუძვლიანობას ჩიტაია განმარტავს მხოლოდ იმით, რომ მან მიიღო ასეთი ინფორმაცია. გამოკითხვის ოქმში ვლადიმერ ჩიტაია ადასტურებს პატაკით წარმოდგენილ ინფორმაციას," — განაცხადა ჯუბა ქათამაძემ.

პროკურატურის მოთხოვნის მიხედვით, ამაღლობელის მობილურიდან არამარტო არსებული, არამედ წაშლილი შეტყობინებებიც უნდა იქნეს ამოღებული.

ადვოკატებს უჩნდებათ ეჭვი, რომ შესაძლოა, პროკურატურას მზია ამაღლობელის ტელეფონზე წვდომა მისი სამსახურებრივი და პირადი ინფორმაციის ამოღებისთვის სურდეს.

მზია ამაღლობელის ადვოკატი მაია მწარიაშვილმა ისაუბრა თუ რამდენად არალოგიკურია ეს ბრალდება ამაღლობელის წინააღმდეგ და გაუგებარია ამაღლობელის მობილურიდან ინფორმაციის ამოღების საჭიროება.

"რატომ გავამახვილეთ ყურადღება და რატომ ვშუამდგომლობთ სასამართლო პრაქტიკის თვალსაზრისით და არა იმიტომ, რომ ამ ტელეფონში აღმოჩნდება რაღაც გაუგებარი ინსტრუქციები, რაც ოდნავი საღი აზრის პირობებშიც არ შეიძლება ამის ვარაუდი გააჩნდეს.

ამ დეტექტივ ჩიტაიას გონება გაუნათდა 15 თებერვალს და მან დაინახა სადღაც, რომელიღაც სიზმარში, რომ შესაძლოა, ქალბატონ მზიას მიეღო ინსტრუქციები თავდასხმასთან დაკავშირებით. ეს არის მთელი ამ საქმის ამბავი. ამის შესაბამისად გამოკითხვა ის გამომძიებელმა და პროკურორმა შოთა ჩხაიძემ აიღო ორი დოკუმენტი [პატაკი და გამოკითხვის ოქმი], ვითომ ესაა მტკიცებულებათა ერთობლიობა და სასამართლოს მოსთხოვა განჩინება. ჩვენ ვციტირებთ საკონსტიტუციო სასამართლოს გადაწყვეტილებას, რომელშიც სასამართლო იდენტურ გარემოებებზე მსჯელობს და ამბობს, რომ სერიოზულიც კი არ არის ამაზე მსჯელობა, ის რაც პატაკში წერია — ეფემერული და აბსოლუტურად ზოგადი, თითქოს, დამესიზმრა, რომ ის იღებდა ინსტრუქციებს, მაგრამ სიზმარში არ მახსოვს, ვინ მეუბნებოდა ამასო — ამაზე სასამართლო ამბობს, როდესაც ეს პატაკი ასახულია გამოკითხვის ოქმში, ეს სერიოზული არაა. ასეთი პოლიციელები ყოველთვის იქნებიან, ვინც დაწერენ ასეთ პატაკს და ასეთი პროკურორებიც ყოველთვის იქნებიან რომლებიც გამოჰკითხავენ მერე მათ და იტყვის, რომ აქვს გარემოებების ერთობლიობა და ყოველთვის აღმოჩნდება მოსამართლე, რომელიც იტყვის, რომ ის, რაც სინამდვილეში ერთია და თან დაუშვებელია, თურმე ბევრი მტკიცებულება არისო," — განაცხადა ადვოკატმა მაია მწარიაშვილმა.

ბრალდების მხარე ადვოკატების შუამდგომლობას არ დაეთანხმა.

პროკურორის თქმით, სასამართლომ განჩინება იმგვარად გამოსცა, რომ ამაღლობელის პირადი ან სამსახურებრივი ინფორმაციის მოპოვება დაუშვებელია.

მოსამართლე ვიქტორ მეტრეველს ჯერჯერობით აღნიშნულზე პოზიცია არ დაუფიქსირებია.

მზია ამაღლობელის სასამართლო პროცესზე შესვენება გამოცხადდა.

შეგახსენებთ, 4 მარტს გამოცემა ბათუმელებისა და ნეტგაზეთის დამფუძნებლის, მზია ამაღლობელის სასამართლო პროცესი, ბათუმის საქალაქო სასამართლოში გაიმართება.

წინასასამართლო სხდომაზე მოსამართლე ვიქტორ მეტრეველმა უნდა გადაწყვიტოს მხარეების მიერ წარმოდგენილი მტკიცებულებების დასაშვებობის საკითხი. პროცესზე გადაწყდება საქმე გადაეცემა თუ არა სასამართლოს არსებითად განსახილველად. სასამართლო აღკვეთის ღონისძიების გადასინჯვის თაობაზეც იმსჯელებს.

მზია ამაღლობელს სისხლის სამართლის კოდექსის 353-ე მუხლით ედავებიან, რაც პოლიციელზე თავდასხმას გულისხმობს, რომელიც თავისუფლების აღკვეთას 4-დან 7 წლამდე ითვალისწინებს.

ასევე იხილეთ:

"განვიცადე ტკივილი და თანახმა ვარ, ჩამიტარდეს სასამართლო სამედიცინო ექსპერტიზა" — ირაკლი დგებუაძე

ცნობილია იმ 4 პოლიციელის ვინაობა, რომლებიც ადასტურებენ, რომ ირაკლი დგებუაძეს, სილის გაწვნის შემდეგ, ლოყა და ყური გაუწითლდა

სასამართლომ არ მიიღო წარმოებაში ადვოკატების შუამდგომლობა მზია ამაღლობელისთვის აღკვეთის ღონისძიების შეცვლის თაობაზე

სასამართლო სხდომიდან ტექსტი ეკუთვნის პუბლიკას.