ქურთულმა პარამილიტარისტულმა ორგანიზაცია ქურთისტანის მუშათა პარტიამ (PKK) თურქეთთან ცეცხლის შეწყვეტის შესახებ გამოაცხადა მას შემდეგ, რაც მათ ამისკენ ციხეში მყოფმა ლიდერმა, აბდულა ოჯალანმა მოუწოდა.

1 მარტს გაკეთებულ განცხადებაში PKK-მ განაცხადა, რომ იმედი აქვთ, რომ თურქეთი გაათავისუფლებს 1999-ში დაკავებულ ოჯალანს, რათა მან უხელმძღვანელოს განიარაღების პროცესს.

კონფლიქტი, რომლის დასრულებისკენაც თავის მიმდევრებს ოჯალანმა რამდენიმე დღის წინ მოუწოდა, სამხრეთ-აღმოსავლეთ თურქეთში ათწლეულებია მიმდინარეობს და ათასობით ადამიანის სიცოცხლე შეიწირა.

რამდენიმე თვის წინ, კონფლიქტის დასრულების ინიციატივით გამოვიდა თურქეთის ულტრანაციონალისტური პარტია MHP-ის ლიდერი, ერდოღანის მოკავშირე დევლეთ ბაჰჩელი.

ოჯალანი, რომელსაც ქურთი ნაციონალისტები "აპოს" უწოდებენ, პრო-ქურთული პარტიის პარლამენტარებს მარმარილოს ზღვაში მდებარე კუნძულ იმრალიზე არსებულ ციხეში შეხვდა.

"იმისათვის, რომ გავიკვლიოთ გზა ლიდერი აპოს მშვიდობისა და დემოკრატიული საზოგადოების შექმნის მოწოდებისკენ, ჩვენ დღეიდან ვაცხადებთ ცეცხლის შეწყვეტას. ჩვენი ძალები შეიარაღებულ მოქმედებას არ მიმართავენ, თუ მათ თავს არ დაესხმებიან", — განაცხადა PKK-ის აღმასრულებელმა კომიტეტმა.

ქურთისტანის მუშათა პარტიის განცხადებით, უნდა შემსუბუქდეს აბდულა ოჯალანის პატიმრობის პირობები, რათა მან იმუშავოს და იცხოვროს ფიზიკურ თავისუფლებაში და დაამყაროს კონტაქტი მეგობრებთან შეფერხების გარეშე.

პარამილიტარისტული ორგანიზაცია თურქეთთან ომში 1984 წლიდანაა ჩართული — მათი ბრძოლის მიზანი ქურთებისათვის, რომლებიც თუქეთის მოსახლეობის 20%-ს შეადგენენ, სახელმწიფოს დაარსებაა. თურქეთში, ევროკავშირში, დიდ ბრიტანეთსა და აშშ-ში PKK ტერორისტულ ორგანიზაციადაა აღიარებული.