ევროკავშირმა შეაჩერა პროგრამები, რომლებსაც პირდაპირი სარგებელი მოჰქონდა საქართველოს ხელისუფლებისთვის. ჩვენ არ ვაპირებთ Erasmus+ მობილობის და გაცვლითი პროგრამების შეწყვეტას საქართველოსთან — ამის შესახებ ევროკავშირის პრესსამსახურზე დაყრდნობით IPN წერს.

"არა, ჩვენ არ ვაპირებთ Erasmus+ მობილობის და გაცვლითი პროგრამების შეწყვეტას საქართველოსთან. ევროკავშირმა შეაჩერა პროგრამები, რომლებსაც პირდაპირი სარგებელი მოჰქონდა საქართველოს ხელისუფლებისთვის. ახალგაზრდები არიან მცდელობის სათავეში, რომლის მეშვეობითაც საქართველომ ევროკავშირის გზაზე სვლა უნდა გააგრძელოს. ევროკავშირი გააგრძელებს მათ გვერდით ყოფნას", — აცხადებენ ევროკავშირის პრესსამსახურის ოფისში.

შეგახსენებთ, რომ საქართველოში გერმანიის ელჩმა, პეტერ ფიშერმა გუშინ სოციალურ ქსელში დაწერა, რომ "გერმანიის განათლებისა და კვლევის ფედერალურმა სამინისტრომ გერმანულ-ქართული სამეცნიერო თანამშრომლობის განვითარება შეაჩერა, მათ შორის სტუდენტთა მობილობა, კვლევა და საქართველოს მონაწილეობა ევროკავშირის პროგრამებში — საქართველოს მიერ აკადემიური თავისუფლების შეზღუდვისა და ევროკავშირში გაწევრიანების შეჩერების გამო.

ელჩის განცხადებას საქართველოს განათლების და მეცნიერების მინისტრი ალექსანდრე წულაძე გამოეხმაურა. მისი თქმით, ეს ინფორმაცია არ ეხება არც ერთ მიმდინარე პროექტს და მასში სამომავლო თანამშრომლობაზეა საუბარი.

მოგვიანებით კი გერმანიის განათლებისა და კვლევის მინისტრი ჩემ ოზდემირი საქართველოს განათლებისა და კულტურის მინისტრ ალექსანდრე წულაძისთვის მიწერილ წერილში იმ მიზეზებს განმარტავს, რის გამოც გერმანია საქართველოსთან სამეცნიერო თანამშრომლობას აჩერებს.

ოზდემირმის თქმით, გერმანიამ ეს გადაწყვეტილება ქართული ოცნების მიერ ევროკავშირში გაწევრიანების პროცესის 4 წლით შეჩერების და საქართველოში მზარდი აკადემიური შეზღუდვების გამო მიიღო.