ამერიკელმა მსახიობმა ჯონ ლითგოუმ საბოლოოდ დაადასტურა, რომ ჰარი პოტერის სერიალში ითამაშებს და ჯადოქრების სკოლის დირექტორს, ალბუს დამბლდორს, განასახიერებს. ვებგამოცემა ScreenRant-თან ინტერვიუში ორი ოქროს გლობუსის მფლობელმა ვარსკვლავმა აღნიშნა, რომ ეს შეთავაზება მისთვის მოულოდნელი აღმოჩნდა.

"სანდენსის კინოფესტივალზე ვიყავი, რომ დამირეკეს", — იხსენებს ლითგოუ, — "ადვილად მისაღები გადაწყვეტილება არ ყოფილა, რადგან, ვშიშობ, ეს [პროექტი] ჩემი ცხოვრების ბოლო თავს განსაზღვრავს. თუმცა, მაინც ძალიან მიხარია".

მსახიობს ამ შემოდგომით 80 წელი უსრულდება. ჰარი პოტერის სერიალი კი, როგორც უკვე ვიცით, შვიდ სეზონს მოიცავს — ჯოან როულინგის ფენტეზი საგის თითოეული წიგნის ეკრანიზაციას ერთი სეზონი დაეთმობა.

"ჰარი პოტერმა ისევ მიიქცია უამრავი შესანიშნავი ადამიანის ყურადღება, ამიტომაც გამიჭირდა ასე ძალიან გადაწყვეტილების მიღება", — აღნიშნავს ლითგოუ, — "გადაღებები რომ დასრულდება, ასე, 87 წლამდე ასაკის ვიქნები, მაგრამ მაინც დავთანხმდი შემოთავაზებას".

ჯონ ლითგოუ უინსტონ ჩერჩილის როლში (The Crown)

ფოტო: Netflix

მითქმა-მოთქმის მიუხედავად, ჰარი პოტერის სერიალში ჯერჯერობით არცერთი სხვა მსახიობის მონაწილეობა არაა დადასტურებული. ამიტომ, სოციალურ ქსელებში ფანებიც თამამად განიხილავენ ამა თუ იმ მსახიობის პერსპექტივას სხვადასხვა როლზე. მაგალითად, სურთ, ლორდი ვოლდემორი კილიან მერფიმ განასახიეროს.

რაც შეეხება დამბლდორს, ჯოან როულინგის წიგნების ეკრანიზაციებში ჯადოქრების სკოლის დირექტორი სამმა სხვადასხვა მსახიობმა განასახიერა: პოტერიადის ფილმებში მისი როლი რიჩარდ ჰარისმა და მაიკლ გემბონმა შეასრულეს, ჯადოსნური ცხოველების სერიაში კი ახალგაზრდა დამბლდორი ჯუდ ლოუმ ითამაშა.

ფოტო: Warner Bros. Pictures

წლების განმავლობაში გავრცელებული ხმები, ჰარი პოტერის სერიალზე მუშაობის შესახებ, საბოლოოდ 2023 წელს დადასტურდა.

ჰარი პოტერი ყველა დროის ერთ-ერთი ყველაზე პოპულარული წიგნების სერიაა. ის თარგმნილია 87 ენაზე და მსოფლიოში 600 მილიონზე მეტ ეგზემპლარად არის გაყიდული. შვიდწიგნეულის მიხედვით გადაღებული რვავე ფილმის შემოსავალმა კი ჯამში $7,7 მილიარდს გადააჭარბა.

ნახეთ ჩვენი ყველა მასალა ჰარი პოტერზე.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…