საგარეო და უსაფრთხოების პოლიტიკის საკითხებში ევროკავშირის პრესსპიკერი, ანუარ ელ ანუნი განცხადებით ეხმაურება ოკუპირებულ აფხაზეთში ჩატარებულ ე.წ "საპრეზიდენტო არჩევნებს". განცხადებაში ვკითხულობთ, რომ ევროკავშირი არ აღიარებს ამ "არჩევნების" კონსტიტუციურ და სამართლებრივ ჩარჩოს.

"ევროკავშირი მხარს უჭერს საქართველოს ტერიტორიულ მთლიანობასა და სუვერენიტეტს, როგორც ეს საერთაშორისო სამართლის შესაბამისად არის აღიარებული. რაც შეეხება ე.წ. "საპრეზიდენტო არჩევნებს", რომელიც საქართველოს ოკუპირებულ რეგიონში, აფხაზეთში, 2025 წლის 15 თებერვალს ჩატარდა, აღვნიშნავთ, რომ ევროკავშირი არ აღიარებს მის კონსტიტუციურ და სამართლებრივ ჩარჩოს. ევროკავშირი გააგრძელებს არაღიარებისა და ჩართულობის პოლიტიკის გატარებას", — ვკითხულობთ განცხადებაში.