ევროსაბჭომ საქართველოს მიერ, მესამე ცდაზე, სტრასბურგის სასამართლოში მოსამართლის პოზიციაზე წარდგენილი კანდიდატები კვალიფიციურად სცნო.

"საქართველოს სახელმწიფომ სტრასბურგიდან, ევროსაბჭოდან მიიღო წერილი, რომელშიც მრჩეველ-ექსპერტთა პანელი გვატყობინებს, რომ სტრასბურგის სასამართლოში მოსამართლის პოზიციაზე ჩვენ მიერ წარდგენილი ორი კანდიდატურა - ქალბატონი ლალი ფაფიაშვილის და ბატონი ოთარ სიჭინავა - ცნობილი იქნენ, ისევე როგორ რამდენიმე კვირის წინ ბატონი ლადო ჭანტურია, მისაღებ, კვალიფიციურ კანდიდატებად", - ამბობს თეა წულუკიანი.

თუმცა ეს არ ნიშნავს იმას, რომ წარდგენილი კანდიდატები უკვე დაამტკიცეს მოსამართლეებად. ახლა დარჩენილია მეორე ეტაპი, კანდიდატების გასაუბრება საპარლამენტთაშორისო ასამბლეის კომიტეტზე, და მესამე ეტაპი,ს კენჭისყრა.

მოქმედ ხელისუფლებას სტრასბურგში წარსადგენი მოსამართლეობის კანდიდატების შესარჩევად კონკურსის გამოცხადება მესამედ, 25 ივლისს მოუწია. ხელისუფლების მიერ შერჩეული კანდიდატები სტრასბურგმა დაიწუნა. ბოლოს ხელისუფლებამ ლადო ჭანტურია, სოფიო ჯაფარიძე და შოთა გეწაძე შეარჩია, თუმცა სტრასბურგში მათგან მხოლოდ ერთი, ლადო ჭანტურია მოიწონეს. სწორედ დანარჩენი ორი კანდიდატის ჩასანაცვლებლად მოუწია საქართველოს მთავრობასაც ახალი კონკურსის გამოცხადება.

აღნიშნული კონკურსის ფარგლებში მოსამართლეობის სურვილი 28 პირმა გამოთქვა. სპეციალურმა სამთავრობო კომისიამ გასაუბრებაზე მხოლოდ 8 პირი დაიბარა, რომელთაგან შვიდს ინდივიდუალურად გაესაუბრა, მერვე გასაუბრებაზე არ გამოცხადდა.

სტრასბურგის სასამართლოს მოსამართლეობის კანდიდატების ასარჩევ კომისიას ბოიკოტი გამოუცხადა კოალიციამ დამოუკიდებელი და გამჭვირვალე მართლმსაჯულებისთვის. კოალიციას მიაჩნია, რომ ხელისუფლების მიზანია წინასწარ განსაზღვრული კანდიდატების უპირობო მხარდაჭერა, რის გამოც აზრი ეკარგება მათ კომისიაში ჩართულობას.