ევროპარლამენტის სერიოზულად აღქმა დღეს აბსოლუტურად შეუძლებელია, ამის შესახებ ქართული ოცნების პოლიტიკური საბჭოს განცხადებაშია ნათქვამი, რომლითაც ევროსაბჭოს საქართველოზე მიღებულ რეზოლუციას ეხმაურებიან. განცხადებაში ოცნების პოლისაბჭო დონალდ ტრამპს და ევროპას უსურვებს, რომ დაამარცხონ "დიფ სთეითი".

"გვსურს, გამოვეხმაუროთ ევროპარლამენტის მიერ დღეს მიღებულ რეზოლუციას საქართველოს და ქართველი ხალხის მიერ არჩეული ხელისუფლების წინააღმდეგ.

ჯერ კიდევ 2023 წლის 26 მარტს, ამერიკის შეერთებული შტატების მომავალმა პრეზიდენტმა, დონალდ ტრამპმა ამომრჩევლებთან შეხვედრის დროს განაცხადა: "ეს გადამწყვეტი ბრძოლაა. ან "დიფ სთეითი" გაანადგურებს ამერიკას, ან ჩვენ უნდა გავანადგუროთ "დიფ სთეითი".

პრეზიდენტად არჩევის შემდეგ, დონალდ ტრამპი ამ გადამწყვეტ ბრძოლაში აქტიურად ჩაება და ჩვენ წარმატებას ვუსურვებთ მას "დიფ სთეითის" განადგურების საქმეში.

ჩვენი მხრივ, დღეს მიღებული რეზოლუციის საპასუხოდ გვსურს განვაცხადოთ, რომ ან "დიფ სთეითი" გაანადგურებს ევროკავშირს, ან ევროკავშირი გამონახავს ძალას, რომ როგორმე თავი დააღწიოს "დიფ სთეითის" გავლენას.

როგორც პრეზიდენტ ტრამპს ვუსურვებთ გამარჯვებას "დიფ სთეითის" წინააღმდეგ ბრძოლაში, ასევე ევროპასაც ვუსურვებთ, რომ თავი დააღწიოს "დიფ სთეითის" მავნე ზეგავლენას. ჩვენ ამ ბრძოლაში პატრიოტი ევროპელების მხარეს დავდგებით.

ასევე გვსურს საზოგადოებას შევახსენოთ უნგრეთის პრემიერ-მინისტრის, ვიქტორ ორბანის გუშინდელი განცხადება — "ევროპული ინსტიტუტების სერიოზულად აღქმა შეუძლებელია", — წერია განცხადებაში.

ევროპარლამენტმა საქართველოს შესახებ რეზოლუცია დღეს, 13 თებერვალს მიიღო, სადაც საპარლამენტთაშორისო ინსტიტუტებს და წევრ სახელმწიფოებს მოუწოდებენ, რომ არ აღიარონ ოცნების ხელისუფლება და პერსონალური სანქციები დაუწესონ ბიძინა ივანიშვილს, მის ოჯახს, გარემოცვას და რეჟიმის მხარდამჭერ ბიზნესმენებს და მოსამართლეებს, ასევე ტელეკომპანია იმედის და საზოგადოებრივი მაუწყებლის ხელმძღვანელებს და ეროვნული ბანკის პრეზიდენტს.