ყოფილი თავდაცვის მინისტრი და ტელეკომპანია ფორმულას 26%-ის მფლობელი დავით კეზერაშვილი კომპანიაში საკუთარ წილს არხის გენერალურ დირექტორსა და 12.25%-იანი წილის მფლობელს, ზურაბ გუმბარიძეს სიმბოლურ ფასად — 1 ლარად გადასცემს, ინფორმაციას მედიაჩეკერი ავრცელებს.

"წილის მიმღები წილის გამსხვისებლის საკუთრებაში არსებული წილის ყიდვის/საკუთრებაში მიღების სანაცვლოდ წინამდებარე ხელშეკრულებით გათვალისწინებული წესით წილის გამსხვისებლისათვის გადახდილი აქვს სიმბოლური თანხა 1.00 (ერთი) ლარის ოდენობით", — ვკითხულობთ 6 თებერვალს გაფორმებულ ნასყიდობის ხელშეკრულებაში.

7 თებერვალს, ზურაბ გუმბარიძემ, ფორმულას მონაცემებში ცვლილების რეგისტრაციისთვის საჯარო რეესტრს მიმართა. თუმცა, ამავე დღეს რეესტრმა სარეგისტრაციო წარმოება შეაჩერა და მოთხოვნის დასაკმაყოფილებლად დამატებითი დოკუმენტაციის წარდგენა მოითხოვა.

შეგახსენებთ, ტელეკომპანია ფორმულა საჯარო რეესტრში 2019 წლის 22 ივლისს დარეგისტრირდა, მაუწყებლობა კი 1 ოქტომბრიდან დაიწყო. ფორმულა კრეატივის გუნდმა ტელეკომპანია მას შემდეგ დააარსა, რაც ტელეკომპანია რუსთავი 2 ქიბარ ხალვაშს გადაეცა და არხის დირექტორად პაატა სალია დაინიშნა. მაშინ რუსთავი 2 თანამშრომლების ნაწილმა დატოვა და ნაწილი — ნაწილი კი მთავარ არხს შეუერთდა.