აშშ-ის სახელმწიფო მდივანმა მარკო რუბიომ ორშაბათს განაცხადა, რომ ის აშშ-ს საერთაშორისო განვითარების სააგენტოს (USAID) ხელმძღვანელის მოვალეობას შეასრულებს. ამის შესახებ CNN იუწყება. მანამდე ტრამპის ადმინისტრაციამ ფაქტობრივად დახურა სააგენტო და საერთაშორისო დახმარების დიდი ნაწილი შეაჩერა. CNN-ზე დაყრდნობით რადიო თავისუფლება წერს.

როგორც Politiuco წერს, რუბიომ ელ სალვადორში ვიზიტის დროს ჟურნალისტებთან შეხვედრისას თავი "USAID-ის დირექტორის მოვალეობის შემსრულებლად" წარადგინა. მან ასევე განაცხადა, რომ სააგენტო მოქმედებდა უპასუხისმგებლოდ და რომ მისი საქმიანობა არ შედიოდა შეერთებული შტატების ეროვნულ ინტერესებში. ამასთან, მან აღნიშნა, რომ უწყების მთლიანად გაუქმებაზე საუბარი არ არის. სახელმწიფო მდივანმა განმარტა, რომ სააგენტოს ყოველდღიური კონტროლი სახელმწიფო დეპარტამენტის თანამდებობის პირს გადაეცა.

USAID-ის შტაბ-ბინა ვაშინგტონში ორშაბათს დაიხურა. მისმა თანამშრომლებმა ელექტრონული ფოსტით მიიღეს მითითება, რომ სახლში დარჩენილიყვნენ.

CNN-ის ცნობით, პრეზიდენტმა დონალდ ტრამპმა თქვა, რომ USAID-ს "რამდენიმე რადიკალი გიჟი მართავს, რომელთაც თავიდან მოიშორებენ".

"მას [USAID-ს] მართავს რამდენიმე რადიკალი გიჟი და ჩვენ ვაპირებთ მათ თავიდან მოვიშოროთ და შემდეგ მივიღებთ გადაწყვეტილებას", — თქვა ტრამპმა.

რუბიომ განცხადება ელონ მასკის კომენტარის შემდეგ გააკეთა. მასკმა თქვა, რომ ტრამპმა უკვე მიიღო ფუნდამენტური გადაწყვეტილება USAID-ის ლიკვიდაციის შესახებ.

შეგახსენებთ, რომ მილიარდერი და SpaceX-ის და Tesla-ს დამფუძნებელი ილონ მასკი ტრამპის ადმინისტრაციაში სახელმწიფო მმართველობის ეფექტიანობის დეპარტამენტს ხელმძღვანელობს.

25 იანვარს გამოცხადდა, რომ აშშ-ის სახელმწიფო დეპარტამენტმა თითქმის 90 დღით შეაჩერა საგარეო დახმარების თითქმის ყველა ხარჯი. 85 დღეში რუბიო აშშ-ს პრეზიდენტ დონალდ ტრამპს წარუდგენს ანგარიშს, სადაც ის მიუთითებს, რომელი პროგრამები უნდა განახლდეს და რომელი არა.

წლების განმავლობაში, ტრამპი და რესპუბლიკელები აპროტესტებდნენ საგარეო დახმარებაზე თანხების "ფუჭად ხარჯვას" აშშ-ს ყოფილი პრეზიდენტების ბარაკ ობამასა და ჯო ბაიდენის ადმინისტრაციის პირობებში. ტრამპმა მეორე ვადით არჩევიდან პირველივე დღეს, ხელი მოაწერა აღმასრულებელ ბრძანებას, რომელიც სახელმწიფო დეპარტამენტს ავალდებულებს, შეაჩეროს უცხოური დახმარების პროგრამები ყველგან, ეგვიპტისა და ისრაელის გარდა.