ონლაინგამოცემა პუბლიკა პასუხობს შალვა პაპუაშვილს, რომელმაც "თბილისი მოლთან" დაგეგმილი საპროტესტო აქციის ანონსის გამო გამოცემა გააკრიტიკა და Facebook-ზე დაწერა, რომ "ევროკავშირის მიერ დაფინანსებული პუბლიკა სისხლის სამართლის დანაშაულს აანონსებს".

პუბლიკის განცხადებით, შალვა პაპუაშვილი რედაქციის მიმართ სიძულვილს და ძალადობას აღვივებს, რაც დასტურდება მის პოსტზე კომენტარებით.

"პუბლიკა ჟურნალისტური საქმიანობის ფარგლებში აშუქებს ქვეყანაში მიმდინარე მოვლენებს, მათ შორის საპროტესტო აქციებს, ანონსებს და ა.შ.

აქვე აღვნიშნავთ, რომ პუბლიკამ დღეს გააშუქა ბრძანება, რომლის მიხედვითაც საერთაშორისო მნიშვნელობის გზები სტრატეგიული ობიექტების ნუსხაში შევიდა და საზოგადოებას განუმარტა, რომ მისი ბლოკირება სისხლის სამართლის დანაშაულია. ასევე გაშუქდა შინაგან საქმეთა სამინისტროს პრევენციული განცხადება ხვალ დაანონსებულ აქციაზე.

შალვა პაპუაშვილი ცდილობს ზეწოლას ჩვენს სარედაქციო დამოუკიდებლობაზე, ახალისებს ჩვენ მიმართ სიძულვილს და ძალადობას, რაც დასტურდება მის პოსტზე კომენტარებით.

პაპუაშვილის ამ განცხადებას პუბლიკის თანამშრომლები აღვიქვამთ მუქარად", — ვკითხულობთ რედაქციის განცხადებაში.