ბათუმში, აჭარის მთავრობის სახლის წინ საპროტესტო აქცია მიმდინარეობს. აქციის მონაწილეები ქუჩაში კარავის გაშლას ცდილობდნენ, თუმცა პოლიცია ამის საშუალებას არ აძლევდა. მიუხედავად ამისა, მომიტინგეებმა კარვების გაშლა მაინც შეძლეს. მთავრობის სახლთან ამ დრომდე დაძაბული ვითარებაა.

ადგილზე აჭარის პოლიციის უფროსი გრიგოლ ბესელიაც იმყოფება, რომელმაც არ გასცა პასუხი კითხვას იმასთან დაკავშირებით, თუ რომელ კანონზე დაყრდნობით არ აძლევდა პოლიცია მომიტინგეებს კარვის გაშლის საშუალებას.

"ესენი არიან მოძალადე ბანდიტები, აძლევენ უკანონო ბრძანებებს ფორმაში ჩაცმულ ადამიანებს და აიძულებენ რომ დაარღვიონ კანონი, იმიტომ რომ მათ არ შეუძლიათ ძალადობის გარეშე.

ესენი არიან მოძალადე სტალინისტები, ბესელია არის აბსოლუტურად მატყუარა, არაპროფესიონალი პოლიციელი, მის ადმინისტრაციულ შენობაში იძალადეს ჟურნალისტზე, იძალადეს არაერთ ადამიანზე. აქ გამოსული კიდევ დაგვცინის, ნაცვლად იმისა, რომ მოერიდონ ადამიანების გაღიზიანებას.

ესენი არიან პროვოკატორები, რომ დაიჭირონ ადამიანები, რადგან ამათ არ შეუძლიათ დამცირების გარეშე, რადგან ბესელია ამ რეგიონში პროვოკაციისთვის და ძალადობისთვის არის ჩამოსული, ამ რეგიონში დესტაბილიზაციისთვის არის ჩამოსული ეს და მისი ხელის ბიჭი დგებუაძე.

ამ ქალაქში ჩამოვიდნენ იმისთვის, რომ გამოწვიონ დესტაბილიზაცია, არეულობა და ისინი აუცილებლად მიიღებენ საკადრის პასუხს", — განაცხადა ბათუმელების მთავარმა რედაქტორმა ეთერ თურაძემ.

აჭარის მთავრობის სახლთან მომიტინგეები ყოველდღიურად იკრიბებიან და გარდა ხელახალი არჩევნებისა, ითხოვენ პოლიტპატიმრების, მათ შორის ბათუმელებისა და ნეტგაზეთის დამფუძნებლის, მზია ამაღლობელის გათავისუფლებას.