კაცს, რომელმაც თბილისში, დევნილთა სააგენტოს შენობასთან, საწვავი გადაისხა და ცეცხლი წაიკიდა — სხეულის 65 %-იანი დამწვრობა აქვს. იგი რეანიმაციულ განყოფილებაშია მოთავსებული.

აღნიშნული შემთხვევის შესახებ რომელიც გუშინ, 27 იანვარს მოხდა, პირველად ინფორმაცია მოძრაობა "აფხაზეთისთვის" დამფუძნებელმა ნუკრი ნოდიამ გაავრცელა.

ნოდიამ მედია "რადიო თავისუფლებას" უთხრა, რომ სხვა დეტალები მისთვის უცნობია, თუმცა მომხდარს მაინც აფხაზეთიდან დევნილების მიმართ სახელმწიფოს საბინაო პოლიტიკას უკავშირებს.

"ამ ფაქტს უსწრებდა შელაპარაკება და შემდეგ ამ კაცმა თავის დაწვა სცადა. ბევრი კითხვა არსებობს, რამდენად სწორად მუშაობს ბინების გადანაწილების პროგრამა", — ამბობს ნუკრი ნოდია "რადიო თავისუფლებასთან".

გავრცელებული ინფორმაციით, კაცი დამწვრობით შოკით სასწრაფო-სამედიცინო დახმარების ჯგუფმა ხეჩინაშვილის კლინიკის დამწვრობის ცენტრში გადაიყვანა.

ვიდეოკადრები თუ როგორ იწვავს კაცი თავს, რადიო თავისუფლებას მიაწოდეს, რომელიც დევნილთა სააგენტოს გვერდით მდებარე შენობიდან არის გადაღებული. კადრებში ჩანს შესასვლელი მოქალაქეთა მისაღებში. ვიდეოს დასაწყისში კაცს ცეცხლი უკვე წაკიდებული აქვს და, სავარაუდოდ, დაცვის თანამშრომლები ცეცხლის ჩაქრობას ჯერ წყლით, შემდეგ კი ცეცხლმაქრით ცდილობენ.

კაცი, რომელიც ვიდეოში ჩანს, ჯანდაცვის სამინისტროს "დევნილთა, ეკომიგრანტთა და საარსებო წყაროებით უზრუნველყოფის სააგენტოში" დასთან ერთად მივიდა. სააგენტოს პრესსამსახურმა მედიასთან თქვა, რომ ის "არ შემოსულა შენობაში, არანაირი მომსახურება არ მოუთხოვია, არც წერილი არ დაუწერია".

შინაგან საქმეთა სამინისტრომ გამოძიება სისხლის სამართლის კოდექსის 115-ე, თვითმკვლელობამდე მიყვანის მუხლით დაიწყო.