2025 წლის ევროვიზიის სიმღერის კონკურსზე ისრაელს იუვალ რაფაელი წარადგენს. რაფაელი 2023 წლის 7 ოქტომბერს ტერორისტულ თავდასხმას გადაურჩა. 24 წლის მომღერალი მაშინ მეგობრებთან ერთად იმყოფებოდა ნოვას მუსიკალურ ფესტივალზე, რომელიც ჰამასის ერთ-ერთ პირველ სამიზნედ იქცა; ფესტივალზე 364 ადამიანი დახოცეს, 40 კი მძევლად აიყვანეს.

იუვალი, რომელიც ისრაელური ტელეშოუ შემდეგი ვარსკვლავის გამარჯვებული გახდა, იხსენებს, რომ ტერაქტს იგი თავშესაფარში გადაურჩა, სადაც რვა საათის განმავლობაში ცხედრებს შორის იმალებოდა. მისი თქმით, თავდასხმის შედეგად, თავსა და ფეხში ნამსხვრევები ისევ შემორჩა, მუსიკა კი განკურნების პროცესში ძალიან დაეხმარა. რაფაელმა, რომელმაც პროფესიონალური კარიერა გასულ წელს დაიწყო, შემდეგი ვარსკვლავის ფინალურ ტურში ABBA-ის Dancing Queen შეასრულა და ის ფესტივალზე დახოცილ "ანგელოზებს" მიუძღვნა.

ჯერჯერობით უცნობია, რა სიმღერით წარდგება ისრაელელი მუსიკოსი წლევანდელ ევროფესტივალზე.

გასული წლის ევროვიზიაზე ისრაელმა ტელემაყურებლისგან მეორე უმაღლესი ქულა მიიღო და საბოლოოდ მე-5 ადგილი დაიკავა. თუმცა, ამას წინ უძღოდა მწვავე კრიტიკა და ბოიკოტით მუქარა ზოგიერთი კონკურსანტისა და მაყურებელთა ნაწილის მხრიდან, რომლებიც ევროვიზიაზე ისრაელის დაშვებას აპროტესტებდნენ.

რაც შეეხება 2025 წლის კონკურსს, რიგით 69-ე ევროფესტივალს შარშანდელი გამარჯვებული შვეიცარია უმასპინძლებს. ქალაქ ბაზელში კონკურსის ნახევარფინალური ტურები 13 და 15 მაისს, გრანდიოზული ფინალი კი 17 მაისს გაიმართება.

წლევანდელ ევროვიზიაზე მონაწილეობას მიიღებს საქართველოც, თუმცა, ჯერჯერობით უცნობია, როგორ შეირჩევა ჩვენი ქვეყნის წარმომადგენელი მომღერალი და საკონკურსო სიმღერა.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...