აშშ-ის პრეზიდენტი, ჯო ბაიდენი ამბობს, რომ "ღაზაში იარაღი გაჩუმდა". ამის შესახებ მან ისრაელი-ჰამასის ცეცხლის შეწყვეტის შესახებ შეთანხმების ამოქმედების შემდეგ განაცხადა.

"შეთანხმება, რომელიც მე პირველად გასულ მაისში წარვადგინე ახლო აღმოსავლეთისთვის, საბოლოოდ შესრულდა. ცეცხლის შეწყვეტა ძალაში შევიდა ღაზაში და დღეს ჩვენ ვხედავთ მძევლების გათავისუფლებას, სამი ისრაელელი ქალი, რომლებსაც [მათი] ნების საწინააღმდეგოდ ბნელ გვირაბებში აკავებდნენ 470 დღის განმავლობაში", — დასძინა მან.

აშშ-ის პრეზიდენტი ხაზგასმით აღნიშნავს, რომ "ამდენი ტკივილის, ნგრევის, სიცოცხლის დაკარგვის შემდეგ, დღეს ღაზაში იარაღი გაჩუმდა“.

როგორც ბაიდენმა ჟურნალისტებს განუცხადა, იგი მოხარულია, რომ მისი და დონალდ ტრამპის გუნდი ერთხმად საუბრობდა ღაზის სექტორში ცეცხლის შეწყვეტისა და მძევლების გათავისუფლების შესახებ შეთანხმების შესასრულებლად.

"ეს იყო აუცილებელიც, ეფექტურიც და უპრეცედენტოც, მაგრამ წარმატება მოითხოვს რეგიონში ჩვენი მეგობრების გამძლეობასა და მუდმივ მხარდაჭერას", — განაცხადა ბაიდენმა.