დონალდ ტრამპის მიერ 17 იანვარს გამოშვებული კრიპტოვალუტის, ე.წ. მიმკოინ $Trump-ის კაპიტალმა უკვე რამდენიმე მილიარდ დოლარს მიაღწია.

დონალდ ტრამპი 20 იანვარს აშშ-ის 47-ე პრეზიდენტი ოფიციალურად გახდება.

კრიპტოვალუტის ოფიციალურ ვებსაიტზე აღნიშნულია, რომ მომხმარებლებისთვის ამ ეტაპზე ხელმისაწვდომი 200 მილიონი ციფრული ტოკენია, კიდევ 800 მილიონს კი შემდეგი 3 წლის განმავლობაში გამოუშვებენ.

"ჩემი ახალი ოფიციალური ტრამპ-მიმი აქ არის! დროა, აღვნიშნოთ ყველაფერი, რაც გვახასიათებს: მოგება!", — დაწერა ტრამპმა Truth Social-ზე.

$Trump-ის ბაზრის კაპიტალიზაცია, 18 იანვრის შუადღისთვის, ანუ გამოშვებიდან რამდენიმე საათში უკვე 5.5 მილიარდ დოლარს შეადგენდა.

ცნობილია, რომ კრიპტოვალუტის გამოშვებისთვის ტრამპმა ითანამშრომლა CIC Digital LLC-ის კომპანიასთან, რომელთანაც ადრეც ჰქონდა შეხება და ტრამპის ბრენდის ფეხსაცმელები და სუნამოები გაუყიდია. CIC Digital LLC კომპანია Fight Fight Fight LLC-სთან ერთად ტოკენების 80%-ს ფლობს.

თუმცა, მიუხედავად იმისა, რომ მიმკოინები ინტერნეტსივრცეში პოპულარობით სარგებლობენ, მათ რაიმე თანდაყოლილი ღირებულება არ გააჩნიათ და მეტად არასტაბილური ინვესტიციაა.

"ეს Trump Meme ზეიმობს იმ ლიდერის არსებობას, რომელიც რისკების მიუხედავად, არ ნებდება", — წერია კრიპტოვალუტის ვებსაიტზე.