ევროკავშირთან ურთიერთობებში დღევანდელი მოცემულობა არასახარბიელოა, – ამის შესახებ ოცნების ხელისუფლების საგარეო საქმეთა მინისტრმა, მაკა ბოჭორიშვილმა განაცხადა.

თუმცა, ის დარწმუნებულია, რომ "გარკვეული მოცემულობები შეიძლება, შეიცვალოს და გაჩნდეს სულ სხვაგვარი შესაძლებლობები".

"ჩვენი ტრადიციული პარტნიორები, მოკავშირეები და მეგობრები იქცნენ ნომერ პირველ კრიტიკოსებად და, შეიძლება ითქვას, მედროშეებად საქართველოს შიდა საქმეებში ჩარევის და ზეწოლის განხორციელების კუთხით. ამ შემთხვევაში, მე საუბარი მაქვს ჩვენს ევროპელ პარტნიორებზე. რა არის მათი ამგვარი ქმედების საფუძველი, ეს კიდევ ცალკე თემაა. მე ამას ვუკავშირებ უსაფრთხოების გაზრდილ გამოწვევებს ჩვენს რეგიონში, დიდ რეგიონს – ევროპას ვგულისხმობ. ფაქტია, რომ გარკვეული შიშები არსებობს და შიშებით თუ ავხსნით იმ გამძაფრებულ რეაქციებს, რაც საქართველოსთან დაკავშირებით ამოძრავებს ჩვენს ზოგიერთ პარტნიორ ქვეყანას.

დღეს გვაქვს მოცემულობა, რომელიც არასახარბიელოა. არავის არ მოგვწონს ის მდგომარეობა, რომელშიც არის საქართველოს და ევროკავშირის ურთიერთობები. თუმცა ღრმად ვართ დარწმუნებული, რომ გარკვეული მოცემულობები, სწორედ იმ განცხადებებიდან გამომდინარე, რაც გვესმის, ძალიან მალე, შეიძლება, შეიცვალოს და სულ სხვაგვარი შესაძლებლობები გაჩნდეს", – განაცხადა “ოცნების” ხელისუფლების საგარეო საქმეთა მინისტრმა.