"აშშ-ს მხრიდან სანქციები დაეკისრა ბიძინა გრიგორის ძე ივანიშვილს, საქართველოს მმართველი პარტიის, "ქართული ოცნების" დამფუძნებელსა და საპატიო თავმჯდომარეს, საქართველოს დემოკრატიული და ევროატლანტიკური მომავლის რუსეთის ფედერაციის სასარგებლოდ ძირის გამოთხრისთვის, — ამის შესახებ აშშ-ს სახელმწიფო მდივნის, ენტონი ბლინკენის მიერ გავრცელებულ განცხადებაშია ნათქვამი.

გავრცელებულ ინფორმაციაში ვკითხულობთ, რომ აშშ მკაცრად გმობს ქართული ოცნების ქმედებებს ქართველი მოქალაქეების, მომიტინგეების, მედიის წარმომადგენლების, ადამიანის უფლებათა დამცველებისა და ოპოზიციის წევრების მიმართ ძალადობრივ ჩახშობას.

"აშშ-ს მხრიდან სანქციები დაეკისრა ბიძინა გრიგორის ძე ივანიშვილს, საქართველოს მმართველი პარტიის, "ქართული ოცნების" დამფუძნებელსა და საპატიო თავმჯდომარეს, საქართველოს დემოკრატიული და ევროატლანტიკური მომავლის რუსეთის ფედერაციის სასარგებლოდ ძირის გამოთხრისთვის. ივანიშვილმა და "ქართულმა ოცნებამ" დააზიანეს დემოკრატიული ინსტიტუტები, შეუწყვეს ხელი ადამიანის უფლებების დარღვევებს და შეზღუდეს საქართველოში ძირითადი თავისუფლებების განხორციელება. გარდა ამისა, მათ შეაფერხეს საქართველოს ევროატლანტიკური მომავალი – მომავალი, რომელსაც ქართველი ხალხი აშკარად ემხრობა და რომელსაც საქართველოს კონსტიტუცია ითვალისწინებს. ამის შედეგად, საქართველო კიდევ უფრო მოწყვლადი გახდა რუსეთის მიმართ, რომელიც კვლავ იკავებს საქართველოს ტერიტორიების 20 პროცენტზე მეტს.

ჩვენ მკაცრად ვგმობთ ქართული ოცნების ქმედებებს ივანიშვილის ხელმძღვანელობით, მათ შორის ქართველი მოქალაქეების, მომიტინგეების, მედიის წარმომადგენლების, ადამიანის უფლებათა დამცველებისა და ოპოზიციის წევრების მიმართ ძალადობრივ ჩახშობას. აშშ სრულად ერთგულია პასუხისმგებლობის დაკისრებისა იმ პირებზე, ვინც ძირს უთხრის დემოკრატიასა და ადამიანის უფლებებს საქართველოში.

ივანიშვილს სანქციები დაეკისრა აღმასრულებელი ბრძანებულების 14024 მუხლის 1(a)(ii)(C)-ის საფუძველზე, შეერთებულ შტატებში ან მის ფარგლებს გარეთ დემოკრატიული პროცესებისა თუ ინსტიტუტების დანგრევაში პასუხისმგებლობისთვის, თანამონაწილეობისთვის, ან უშუალოდ ან არაპირდაპირ განხორციელებული თუ მცდარი ქმედებებისთვის რუსეთის ფედერაციის მთავრობის სასარგებლოდ ან მისთვის პირდაპირ თუ არაპირდაპირ სარგებლის მისაღებად", – განცხადებას აშშ-ს სახელმწიფო მდივანი ენტონი ბლინკენი ავრცელებს (მთავარის თარგმანი).

დღეს, 27 დეკემბერს აშშ-ს სახაზინო დეპარტამენტმა ქართული ოცნების საპატიო თავმჯდომარე ბიძინა ივანიშვილს ფინანსური სანქციები დაუწესა. ფინანსური სანქციები გულისხმობს, რომ ივანიშვილის ყველა აქტივი რომელიც აშშ-ის იურისდიქციაშია ან კონტროლდება აშშ-ის მოქალაქის მიერ, დაიბლოკება. RealPolitika წერს, რომ ივანიშვილის წინააღმდეგ დაწესებულ სანქციას ე.წ "მეორადი იურისდიქცია" გააჩნია, რაც გულისხმობს შემდეგს: სანქციების რისკის ქვეშ დადგება ყველა ორგანიზაცია თუ ინდივიდუალური პირი, რომელიც ბიძინა ივანიშვილთან საქმიან ურთიერთობას დაიჭერს.