დღეს, 8 დეკემბერს, საქართველოს პრეზიდენტი, სალომე ზურაბიშვილი აშშ-ის არჩეულ პრეზიდენტს, დონალდ ტრამპს პარიზში შეხვდა. ამის შესახებ ზურაბიშვილი ინფორმაციას სოციალურ ქსელში, საკუთარ გვერდზე ავრცელებს.

საქართველოს პრეზიდენტის მიერ გავრცელებულ ფოტოში ვხედავთ, რომ შეხვედრას საფრანგეთის პრეზიდენტი, ემანუელ მაკრონიც ესწრება.

"სიღრმისეული განხილვა მქონდა პრეზიდენტ ტრამპთან და პრეზიდენტ მაკრონთან. ვამხილე მოპარული არჩევნები და უკიდურესად საგანგაშო რეპრესიები ქართველი ხალხის წინააღმდეგ. ხაზი გავუსვი ძლიერი აშშ-ს საჭიროებას. ქართველ ხალხს დონალდ ტრამპის სახით მეგობარი ჰყავს. ღმერთმა დალოცოს ამერიკის შეერთებული შტატები", — წერს ზურაბიშვილი სოციალურ ქსელში.

ამასთან, აღსანიშნავია, რომ საქართველოს პრეზიდენტი პარიზში ილონ მასკსაც შეხვდა.

"შესანიშნავი საუბარი ილონ მასკთან, საქართველოში არსებული სიტუაციის შესახებ. ველოდები, როდის ვუმასპინძლებ მას ჩვენს ქვეყანაში", — წერს პრეზიდენტი X-ზე.

ხუთი წლის წინ, ხანძრის შედეგად განადგურებული ნოტრ-დამის რესტავრაცია სულ ცოტა ხნის წინ დასრულდა. პარიზის ღვთისმშობლის ტაძრის გახსნის ცერემონია დღეს შედგა, რომელსაც 40-მდე ქვეყნის მთავრობის ლიდერი დაესწრო, მათ შორის სალომე ზურაბიშვილი, დონალდ ტრამპი, ვოლოდიმირ ზელენსკი და სხვა.