მამუკა მდინარაძე გამოეხმაურა ამერიკის შეერთებული შტატების მიერ დაწესებულ სავიზო შეზღუდვებს, რომლებიც 20-მდე ქართველ მაღალჩინოსანს შეეხო.

"პირადად მე არანაირი შეტყობინება, არც წინა შემთხვევაში და არც ამ შემთხვევაში, არ მიმიღია. გაგვიმხილონ, ვის ასანქცირებენ. დამარცხდა მთავრობა და დამარცხებული მთავრობა კუდს იქნევს, რომ რაც შეიძლება, რაც აქამდე გააკეთა, უფრო დაამძიმოს, გაართულოს ორ ქვეყანას შორის ურთიერთობა, რომ მერე პრობლემები ურთიერთობებში ძნელი აღმოსაფხვრელი იყოს.

ეს ყველაფერი უკვე ზღვარს გასცდა. პარტნიორობა შევწყვიტეთო, რამდენიმე დღის წინ გამოგვიცხადეს, არადა არც პირდაპირი ფრენები, არც უვიზო მიმოსვლა, არც თავისუფალი ვაჭრობა, რაც პარტნიორობის ჩანასახს მაინც შექმნიდა, ჩვენ არ გვქონია. იმედი გვაქვს, რომ გადაიტვირთება ურთიერთობები და ნელ-ნელა რეალურ საკითხებზე ვილაპარაკებთ და ეს ურთიერთობები მხოლოდ განცხადების დონეზე არ დარჩება", — აცხადებს მამუკა მდინარაძე.

სანქციების შესახებ ენტონი ბლინკენის განცხადებაში ნათქვამია, რომ აშშ მკაცრად გმობს ქართული ოცნების მიერ მიმდინარე, სასტიკ და გაუმართლებელ ძალადობას საქართველოს მოქალაქეების, მათ შორის მომიტინგეების, მედიის წარმომადგენლების, უფლებადამცველების და ოპოზიციის მიმართ. ბლინკენის თქმით, დღევანდელი გადაწყვეტილება აშშ-ს დამატებითი ზომებია იმ პირების მიმართ, ვინც პასუხისმგებელია ქვეყანაში არსებულ ძალადობისა და დემოკრატიის შელახვაზე. წერილში ასევე ნათქვამია, რომ აშშ-მა ქართულ ოცნებასთან აფილირებულ 100-ზე მეტ პიროვნებას და მათი ოჯახის წევრს შეზღუდვები უკვე დაუწესა.

აღსანიშნავია ისიც, რომ სახელმწიფო დეპარტამენტის ვებგვერდზე გამოქვეყნებულ განცხადებაში არ არის ნახსენები "საქართველოს ხელისუფლება", ან "საქართველოს მთავრობა", აშშ-ს სახელმწიფო მდივანი მხოლოდ "ქართულ ოცნებას" ახსენებს.