საქართველოს კომუნიკაციების ეროვნულმა კომისიამ ტელეკომპანია ობიექტივი არასაარჩევნო პერიოდში პატრიოტთა ალიანსის პოლიტიკური რეკლამის განთავსების გამო გააფრთხილა. კომისიის პრესსამსახურმა გადაწყვეტილების შესახებ ინფორმაცია დღეს 29 აგვისტოს გაავრცელა.

"არასაარჩევნო პერიოდში პოლიტიკური პარტიის მიერ მაუწყებლის დაფინანსების აკრძალვა ემსახურება მაუწყებლის დაცვას პოლიტიკური პარტიის გავლენისგან, მაუწყებლის მიუკერძოებლობის, ასევე, თავისუფალი და პლურალისტული დებატის უზრუნველყოფას, რაც აძლიერებს დემოკრატიულ საზოგადოებაში გამოხატვის თავისუფლების ფუნდამენტურ როლს", - განმარტა კომისიამ.

მათივე ინფორმაციით, კომისიამ ტელეკომპანია ობიექტივს 8 აგვისტოს წერილობით მიმართა და პატრიოტთა ალიანსის რეკლამის მოხსნა მოითხოვა, თუმცა არხმა საპასუხო წერილში აღნიშნა, რომ პარტიის შესახებ ინფორმაცია კომერციული რეკლამის სტატუსით გადაიცემოდა.

საქართველოს კანონმდებლობით, პოლიტიკური პარტიის მიერ მაუწყებლის დაფინანსება ნებადართულია მხოლოდ წინასაარჩევნო პერიოდში და ისიც მხოლოდ პოლიტიკური რეკლამის განთავსების მიზნით.

კომისიამ ერთხელ უკვე იმსჯელა მსგავს საქმეზე. ტელეკომპანია რუსთავი 2-მა არასაარჩევნო პერიოდში ევროპული საქართველოს პოლიტიკური რეკლამა განათავსა. იმის გამო, რომ კომისიას მსგავს საკითხზე მანამდე ნამსჯელი არ ჰქონდა, არხი ადმინისტრაციული პასუხისმგებლობისგან გაათავისუფლა.