9 დეკემბრის ღამეს, პედიატრი და მოძრაობა "ჯიუტის" წევრი, კოტე ჩახუნაშვილი დააკავეს. როგორც ცნობილია, ჩახუნაშვილი სამართალდამცავებმა პოლიციის კანონიერი მოთხოვნის დაუმორჩილებლობის მუხლით, ადმინისტრაციული წესით დააკავეს.

მანამდე, ჩახუნაშვილის ახლობელმა ვიდეო გაავრცელა, სადაც ჰყვება, რომ ნუცუბიძის 69 ნომერში, მისი ავტომობილი ცარიელი იპოვეს. ჩახუნაშვილის ადგილმდებარეობის გაგებამდე, მისმა მეუღლემ, ეკატერინე კვირკველიამ სოციალურ ქსელში პოსტი გაავრცელა, რომ მან 20:00 საათზე დატოვა საცხოვრებელი სახლი და მას მერე კონტაქტზე არ გამოსულა.

"მაქსიმალურად გვეხმარებიან ადვოკატები და არასამთავრობო ორგანიზაციები. კოტე სახლიდან გავიდა 50 წუთის წინ, უნდა შეხვედროდა მეგობარს რუსთაველზე, აქციაზე. რომ არ შეხვდა მეგობარს, დავიწყეთ მისი ძებნა. ტელეფონნი აქვს გათიშული და სახლიდან რამდენიმე მეტრშია დაყენებული კოტეს მანქანა. დღეს რეპრესიებია გამოცხადებული. არანაირი მიზეზი არ სჭირდება სახელმწიფოს, რომ ვინმე ქუჩიდან მოხსნას", – აცხადებდა მისი ოჯახის წევრი.

ცნობისთვის, წინა დღით ცნობილი გახდა, რომ პოლიციის თანამშრომლები კოტე ჩახუნაშვილის საცხოვრებელ სახლში მივიდნენ და დაკითხვაზე დაიბარეს სისხლის სამართლის საქმეზე, სხვა დეტალები არ დაუკონკრეტებიათ, ჩახუნაშვილმა კი დაკითხვაზე მისვლაზე უარი თქვა.