აშშ-ს არჩეული პრეზიდენტი დონალდ ტრამპი აცხადებს, რომ უკრაინა უნდა მოემზადოს ამერიკის შეერთებული შტატებისგან ნაკლები დახმარების მისაღებად და ევროპამ უნდა გაზარდოს უკრაინის დახმარება. ამის შესახებ აშშ-ის არჩეულმა პრეზიდენტმა, დონალდ ტრამპმა NBC News-თან ექსკლუზიურ ინტერვიუში განაცხადა.

წამყვანის კითხვაზე, უნდა დაელოდოს თუ არა უკრაინა ამერიკის დახმარების შემცირებას, დონალდ ტრამპმა უპასუხა, რომ ალბათ, ასე იქნება.

"ამერიკა მათ დაეხმარა 350 მილიარდით, ხოლო ევროპა 100 მილიარდით, რატომ არ ვეხმარებით თანაბრად? ევროპამ უნდა გაათანაბროს. ასევე ნატოს წევრებმა უნდა გადაიხადონ საწევრო. რუსეთთან ომი ევროპისთვის უფრო მნიშვნელოვანია ვიდრე ჩვენთვის", — განაცხადა ტრამპმა.

ამასთან, ჟურნალისტის შეკითხვაზე, ჰქონდა თუ არა კომუნიკაცია რუსეთის პრეზიდენტთან, ვლადიმერ პუტინთან, ტრამპმა განაცხადა, რომ მას არ ჰქონია კომუნიკაცია, თუმცა შემდეგ აღნიშნა, რომ არ სურს რაიმე ისეთის თქმა, რაც ხელს შეუშლის მოლაპარაკებებს.