მთავრობის ადმინისტრაციაში გამართულ პრესკონფერენციაზე ოცნების პრემიერ-მინისტრმა, ირაკლი კობახიძემ, პოლიციელები კიდევ ერთხელ შეახო და მათ გმირები უწოდა.

"თუ ვინმე ამტკიცებს ევროპელობას რუსთაველის გამზირზე, ყველაზე მეტად სწორედ ეს გმირი პოლიციელები არიან. მინდა, მათ მადლობა გადავუხადო მოთმინებისთვის", — განაცხადა მან.

ირაკლი კობახიძემ მშვიდობიანი მომიტინგეები ისევ "ძალადობაში" დაადანაშაულა, ხოლო ჟურნალისტების შესახებ განაცხადა, რომ მათ ორმაგი სტანდარტები აქვთ. ეს იმის ფონზე, როცა ბოლო დღეებში არაერთ ჟურნალისტსა და ოპერატორს ფიზიკურად გაუსწორდნენ.

"10-ზე მეტ პოლიციელს დასჭირდა ქირურგიული ჩარევა. ეს არის მარტო ისეთი შემთხვევები, სადაც საჭირო გახდა ქირურგიული ჩარევა. არის უამრავი დაზიანების ფაქტი პოლიციელების მხარეს, არავითარი დაგმობა არ განხორციელებულა ასეთი ძალადობის მიმართ. პოლიციელებს უწევთ, აიტანონ უმძიმესი ფიზიკური და ფსიქოლოგიური ძალადობა. კონკრეტული პოლიტიკური ძალები და მათი მედიასაშუალებები მათ უწოდებენ შავრაზმელებს, რუსულ ომონს და ა.შ., რაც უბრალოდ სამარცხვინოა, ესეც არის ორმაგი სტანდარტის გამოვლინება“, — თქვა კობახიძემ.