ინტენსიური თოვის, დაბალი ტემპერატურისა და ლიპყინულის გამო საავტომობილო გზებზე შეზღუდვები დაწესდა. საავტომობილო გზების დეპარტამენტი გზებზე არსებულ ვითარებასთან დაკავშირებით ინფორმაციას ავრცელებს.

დეპარტამენტის ცნობით:

  • რთული მეტეოროლოგიური პირობების (ქარბუქი, შეზღუდული ხილვადობა) გამო, შიდასახელმწიფოებრივი მნიშვნელობის კოდა–ფარცხისი–მანგლისი–წალკა-ნინოწმინდის საავტომობილო გზის კმ94-კმ110 (ფარავანის უღელტეხილი) მონაკვეთზე, დროებით იზღუდება ყველა სახის ავტოტრანსპორტის მოძრაობა.
  • რთული მეტეოროლოგიური პირობების (ინტენსიური თოვა და ქარბუქი) გამო, შიდასახელმწიფოებრივი მნიშვნელობის ბათუმი(ანგისა)-ახალციხის საავტომობილო გზის კმ106-კმ123 (კურორტი გოდერძი-უტყისუბანი) მონაკვეთზე, დროებით იზღუდება ყველა სახის ავტოტრანსპორტის მოძრაობა.


მოქალაქეების ინფორმაციით, მოძრაობა თითქმის შეუძლებელია რიკოთის უღელტეხილზე. არ არის გზები გაწმენდილი და ამის გამო მათ საათების განმავლობაში უწევთ საცობში დგომა.

NEWS.On.ge თემაზე საავტომობილო გზების დეპარტამენტს დაუკავშირდა.

სააგენტოს ცნობით, მთელი ღამის განმავლობაში მიმდინარეობდა გზების წმენდა. აღნიშნული საცობი კი ავტოსაგზაო შემთხვევების გამოა გამოწვეული. მათი თქმით, ეს ყველაფერი იმის ბრალია, რომ მოქალაქეები ახლაც ზაფხულის საბურავებით გადაადგილდებიან.

"გავრცელებულ ვიდეოებში რასაც ვხედავთ ჩვეულებრივი საცობია, რაც სავარაუდოდ ავტოსაგზაო შემთხვევების გამოა გამოწვეული. მოქალაქეები ასეთ ამინდშიც ზაფხულის საბურავებით გადაადგილდებიან. გზების დეპარტამენტისგან მე რაც შემიძლია გითხრათ არის ის, რომ ჩვენი მხრიდან მთელი ღამის განმავლობაში იწმინდებოდა გზა და გზაზე იყრებოდა ტექნიკური მარილი. ამ წუთებშიც, გზებზე მობილიზებულია სპეციალური ტექნიკა და სადაც შესაძლებელია იწმინდება გზები" — გვითხრეს სააგენტოში.

საქართველოში უამინდობა რამდენიმე დღეა გრძელდება. meteo.gov.ge-ის ინფორმაციით, დღეს, საქართველოს უმეტეს რაიონში წვიმა, მთაში კი თოვლია მოსალოდნელი.