ალბათ, ყველას გვახსოვს, რა ამბავი დაატრიალეს გრეტა გერვიგის ბარბიმ და კრისტოფენ ნოლანის ოპენჰაიმერმა გასული წლის ზაფხულში. ორი ფილმი, რომელთა დებიუტსაც უამრავი მაყურებელი ელოდა სულმოუთქმელად, დიდ ეკრანებზე ერთსა და იმავე დღეს, 21 ივლისს გამოვიდა და კინოს ინდუსტრიის ყველაზე პოპულარული ტრენდიც — ბარბენჰაიმერი — დაიბადა. ყველა იმაზე ბჭობდა, რომელი ფილმი იყო უკეთესი, რომელი უფრო მეტ თანხას გამოიმუშავებდა და რომელი აიღებდა ყველაზე მეტ ჯილდოს, და, რა თქმა უნდა, ბარბენჰაიმერზე უამრავი მიმი იქმნებოდა.

ისტორია მეორდება — ნოემბერში ჰოლივუდის ორ ყველაზე მნიშვნელოვან ფილმად თავისუფლად შეიძლება ჩაითვალოს ცნობილი მიუზიკლის, ალქაჯის (Wicked) ეკრანიზაცია და 2000 წელს გამოსული ლეგენდარული ისტორიული დრამის, გლადიატორის მეორე ნაწილი. ფანებმა ამ კულტურულ მომენტს ალქაჯიატორი (Glicked) შეარქვეს.

რიდლი სკოტის გლადიატორ 2-ში ისეთ ცნობილ მსახიობებს იხილავთ, როგორებიც არიან პოლ მესკალი, პედრო პასკალი, დენზელ ვაშინგტონი, ჯოზეფ ქუინი და ა.შ., ალქაჯში კი არიანა გრანდესა და სინტია ერივოს საოცარ დინამიკითა და ბროდვეის ლეგენდარული დონით აღფრთოვანდებით.

ორივე ფილმს თავბრუდამხვევი დებიუტი ჰქონდა — კინოთეატრებში გამოსვლიდან პირველ შაბათ-კვირას მხოლოდ ამერიკის შეერთებულ შტატებში ალქაჯის შემოსავალმა $114 მილიონს გადააჭარბა, გლადიატორი 2-ისამ კი $55.5 მილიონს. დაჯილდოებების სეზონი კარსაა მომდგარი და, საინტერესოა, რომელი ფილმი შეძლებს "შეჯიბრში" გამარჯვების მოპოვებას.

იხილეთ ასევე: