თბილისის 146-ე სკოლის ექვსი მოსწავლე რუსული ენის შემსწავლელ კურსებზე ანექსირებულ ყირიმში, არტეკის საერთაშორისო საბავშვო ცენტრში გაემგზავრა. პირველი საერთაშორისო შეკრება არტეკში მიმდინარე წლის 7-27 აგვისტოს პერიოდში იმართება.

არტეკი რუსული ენის შემსწავლელი ბანაკია, სადაც პროგრამის პედაგოგებთან ერთად უცხო ქვეყნიდან ჩამოსული რუსული ენის პედაგოგებიც ჩაატარებენ გაკვეთილებს. მის ორგანიზატორი, რუსეთის ხელისუფლების სახელით, რუსული ენის საბჭოა.

განათლებისა და მეცნიერების სამინისტროში აღნიშნავენ, რომ ქართულ მხარეს უკვე ჰქონდა კომუნიკაცია უკრაინულ მხარესთან, რა დროსაც მათ მომხდარი განუმარტეს:

"სამწუხაროა, რომ სკოლის ადმინისტრაციამ ან ერთმა კონკრეტულმა მასწავლებელმა გაუთვითცნობიერებელი გადაწყვეტილება მიიღო, რის გამოც სკოლის მოსწავლეები რუსეთის მიერ ანექსირებულ ყირიმში მოხვდნენ... განათლებისა და მეცნიერების სამინისტრო კომპეტენტურ ორგანოებთან ერთად შეისწავლის, იყო თუ არა ეს მასწავლებლის ინდივიდუალური გადაწყვეტილება თუ მიზანმიმართული ქმედება".

რუსეთის მიერ ანექსირებულ ყირიმში თბილისის 166-ე მოსწავლეების გამგზავრების შესახებ ინფორმაცია 21 აგვისტოს Sputnik Georgia-მ გაავრცელა. განათლების სამინისტროში კი On.ge-ს განუცხადეს, რომ ყირიმში არა 166-ე, არამედ 146-ე სკოლის მოსწავლეები გაემგზავრნენ. სკოლის ადმინისტრაცია და დირექტორი On.ge-ს სატელეფონო ზარებს არ პასუხობენ.

Sputnik Georgia-სთან ინტერვიუში სკოლის მოსწავლეები ყვებიან, რომ არტეკის შესახებ სკოლის რუსული ენის პედაგოგისგან გაიგეს. ყირიმში გასამგზავრებლად მათ შესაბამისი კონკურსი გაიარეს. კონკურსის ფარგლებში მათ გადაიღეს ვიდეორგოლები და გააკეთეს სლაიდები თემაზე "რას ნიშნავს ჩვენთვის რუსეთი და რა როლს თამაშობს ის ჩვენს ცხოვრებაში". როგორც სტატიიდან ირკვევა, კონკურსი პუშკინის სახელობის რუსული ენის სახელმწიფო ინსტიტუტმა ჩაატარა.

გამოცემის ცნობით, პროგრამაში 20-მა პედაგოგმა და 170-მა მოსწავლემ მიიღო მონაწილეობა 26 ქვეყნიდან: ავსტრია, ავსტრალია, სომხეთი, ბელორუსია, ბულგარეთი, უნგრეთი, ვიეტნამი, საქართველო, ინდოეთი, ესპანეთი, იტალია, ყაზახეთი, ჩინეთი, ყირგიზეთი, მოლდოვა, მონღოლეთი, პალესტინა, სერბეთი, სლოვენია, თურქეთი, უზბეკეთი, უკრაინა, საფრანგეთი, ჩეხეთი და შვეიცარია.

უკრაინის ტერიტორია ყირიმი 2014 წლის 18 მარტის შემდეგ რუსეთის ფედერაციის მიერაა ანექსირებული. ყირიმის ნახევარკუნძული დე ფაქტოდ შეიყვანეს ფედერაციის შემადგენლობაში, როგორც ყირიმის ფედერალური ოლქი.