მე მგონია, რომ ბოლოს ყველა შემოვა პარლამენტში, — ამის შესახებ პრემიერმინისტრმა ირაკლი კობახიძემ ისაუბრა.

მისი თქმით, სინამდვილეში ყველამ იცის, რომ მოუწევთ პარლამენტში შესვლა.

"მე მგონია, რომ ბოლოს ყველა შემოვა პარლამენტში. ნაციონალურმა მოძრაობამ და ახალმა კანონის დარღვევით დაწერეს განცხადებები არშესვლასთან დაკავშირებით და ეს გააკეთეს ერთი მარტივი მიზეზით, იმისთვის, რომ შემდეგ აღარ მოუწიოთ განცხადების დაწერა. ეს განცხადებები არ არის კანონიერი, ლეგიტიმური. სინამდვილეში ყველამ იცის, რომ მათ მოუწევთ პარლამენტში შემოსვლა" — ამბობს პრემიერმინისტრი.

კობახიძე ამტკიცებს, არც ერთ ქვეყანაში პარლამენტს არ სჭირდება ოპოზიციის ლეგიტიმაცია და ეს რომ სხვანაირად იყოს, ვერც ერთი დემოკრატიული სისტემა ვერ შედგებოდა.

"ერთადერთი, ვისი ლეგიტიმაციაც სჭირდება ქვეყნის პარლამენტს, ეს არის მოსახლეობა, ამომრჩეველი, ქართველი ხალხი და სწორედ, ქართველმა ხალხმა მიანიჭა პარლამენტს ლეგიტიმაცია" — თქვა პრემიერმა.