თელ-ავივის მაკაბისა და ამსტერდამის აიაქსს შორის უეფას ევროპა ლიგის ჯგუფური ეტაპის მატჩი ძალადობრივი შეტაკებებით დასრულდა. მაკაბის 200-მდე მხარდამჭერმა, ე.წ "ულტრასებმა", რომელთა ნაწილიც, გავრცელებული ცნობებით ისრაელის თავდაცვის ძალებთანაა დაკავშირებული, ამსტერდამის ქუჩებში არეულობა მოაწყო. გავრცელებულ ვიდეოებში ჩანს, როგორ გლეჯენ დემონსტრანტები პალესტინის დროშებს და ანტიარაბულ სლოგანებს სკანდირებენ — ერთ-ერთ ვიდეოში ისრაელელი ფანები ერთხმად მღერიან ფრაზას "ღაზაში სკოლები აღარ არის, რადგან იქ ბავშვები აღარ დარჩნენ". საერთაშორისო ორგანიზაციების ინფორმაციით, 2023 წლის 7 ოქტომბრის შემდეგ, ღაზაში ისრაელის არმიის თავდასხმებს 17000-მდე ბავშვი შეეწირა, რაც საერთო მსხვერპლის 44%-ს შეადგენს.

ულტრასების ქმედებების ამსახველი ვიდეოები სოცმედიაში სწრაფად გავრცელდა, რამაც პროპალესტინურ ჯგუფებსა და ფანებს შორის ურთიერთობა ძალიან დაძაბა.

მატჩამდე ამსტერდამის მერმა, ფემკე ჰალსემამ პროპალესტინური დემონსტრაცია აიაქსის სტადიონს, იოჰან კრუიფ არენას, მოაშორა, რათა კონფრონტაციის რისკი მინიმუმამდე შეემცირებინა, თუმცა მაკაბის ფანებმა მსვლელობა დამის მოედნამდე გააგრძელეს, რამაც სიტუაცია გაამწვავა. ფანებმა ადგილობრივების გაღიზიანება გამოიწვიეს იმითაც, რომ ესპანეთში წყალდიდობის შედეგად დაღუპულთა ხსოვნის პატივსაცემი წუთიერი დუმილი დაარღვიეს.

შეტაკებები მას შემდეგ დაიწყო, რაც მატჩი ანგარიშით 5-0 დასრულდა აიაქსის სასარგებლოდ. ნიდერლანდების პოლიციის ცნობით, ძალადობრივი დაპირისპირების 57 მონაწილე დააკავეს, ხოლო ისრაელის საგარეო საქმეთა მინისტრმა განაცხადა, რომ 10 ისრაელელი დაშავდა, ორის პოვნა კი ვერ მოხერხდა.

ნიდერლანდების სამეფოს პრემიერმინისტრმა, დიკ სხოფმა ძალადობა დაგმო, მას "ანტისემიტური თავდასხმა" უწოდა და ისრაელის პრემიერმინისტრ ბენიამინ ნეთანიაჰუს ნიდერლანდების სახელით მხარდაჭერა გამოუცხადა. სხოფმა მიკერძოებულობის გამო კრიტიკა დაიმსახურა.

ბენიამინ ნეთანიაჰუ ნიდერლანდებში სამაშველო თვითმფრინავების გაგზავნასაც გეგმავდა, თუმცა მოგვიანებით ეს მისია გაუქმდა. ამჟამად ნიდერლანდელი და ისრაელელი მაღალჩინოსნები არეულობის აღკვეთაზე ერთობლივად მუშაობენ. ვითარება ნიდერლანდების დედაქალაქში ამ დრომდე დაძაბულია.