რა დროს შობააო, იტყვი, მაგრამ თუკი მერაია ქერი ამბობს, რომ დროა, ჩვენ ვინ ვართ, შევეწინააღმდეგოთ?! ეგეც რომ არა, 1-ელ ნოემბერს ჰელოუინის გასტუმრება და შობა-ახალწლის სეზონის გახსნა მერაია ქერიმ უკვე ყოველწლიურად ტრადიციად აქცია.

ტრადიცია კია, მაგრამ ამერიკელი პოპვარსკვლავი ყოველ წელს ცდილობს, ორიგინალური გზა მონახოს თავისი საფირმო ფრაზის სათქმელად: "დროა!!!". მუსიკოსმა 2021 წელს ჰელოუინის გოგრები ბეისბოლის ჯოხით დაამსხვრია, 2022-ში — ჯადოქრიდან სანტად გადაიქცა, შარშან გადაწყვიტა, ცნობილი მიმი გაეცოცხლებინა, ამჯერად კი, არც მეტი, არც ნაკლები, მორტიშა ადამსის როლში მოგვევლინა.

მორტიშა, რასაკვირველია, ადამსების ცნობილი ოჯახის წევრი და ჰელოუინის ერთ-ერთი სიმბოლოა. ჰოდა, მერაიამაც ჰელოუინის გასაცილებლად მორტიშას გარდერობი შეუცვალა და საშობაო კოსტიუმი ჩააცვა. ვიდეოს დასაწყისში ვხედავთ, როგორ ცეკვავენ შავ-ბნელ ოთახში მორტიშა და მისი ქმარი, გომესი, მერე კი, ჩვენი მერაია სამოსს იცვლის, გომესს თოვლის პაპად აქცევს და წკრიალა ხმით გვახარებს, დროაო!

მერაია ქერი შობა-ახალწლის დედოფლის წოდებას უკვე სამი ათწლეულია, ამაყად ატარებს. მუსიკოსის უდავოდ ყველაზე ცნობილი სიმღერა, All I Want for Christmas Is You, ზუსტად ამდენი ხანია, ზამთრის დღესასწაულების კლასიკაა, რომლის პოპულარობაც წლიდან წლამდე არათუ არ ნელდება, იზრდება კიდეც.

All I Want for Christmas Is You ("ერთადერთი რამ, რაც საშობაოდ მინდა, შენ ხარ") მერაია ქერიმ 1994 წელს გამოუშვა თავის საშობაო ალბომთან ერთად. მას შემდეგ სიმღერის პოპულარობა ისე გაიზარდა, რომ პირველი საშობაო ტრეკი გახდა, რომელსაც ამერიკის ხმისჩამწერი კომპანიების ასოციაციამ (RIAA) ბრილიანტის სტატუსი მიანიჭა. 2021 წელს ქერიმ რეკორდი მოხსნა და თავისი სიმღერით ზედიზედ მესამედ მოექცა ბილბორდის ასეულის სათავეში.

მხოლოდ ამ სიმღერამ მერაია ქერის $60 მილიონზე მეტი მოუტანა. თუმცა, როგორც მომღერალი ამბობს, თავად სულაც არ მოელოდა ასეთ წარმატებას მაშინ, როცა კომპოზიცია მსოფლიოში პირველად მოისმინეს.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...