ჰელსინკის კომისია ატლანტიკური საბჭოს თანაშრომლების, სოფო გელავასა და ეთო ბუზიაშვილის საბანკო ანგარიშებზე წვდომის შეზღუდვას საქართველოს სამოქალაქო საზოგადოებაზე და მათ დამსაქმებელ ამერიკულ ინსტიტუტზე თავდასხმად აფასებს. კომისიის თავმჯდომარე ჯო უილსონის განცხადებაში ქართული ოცნების ხელისუფლებაზე წერია, რომ ის რუსული სტილის ავტორიტარიზმზე გადადის.

"დღეს გავიგე, რომ საქართველოს ხელისუფლებამ ქალბატონი ბუზიაშვილისა და ქალბატონი გელავას ბანკის ანგარიშები გაყინა, ყველანაირი სამართლებრივი დასაბუთებისა და სასამართლოს ბრძანების გარეშე. მჯერა, რომ ეს საქართველოს მთავრობის მხრიდან პირდაპირი თავდასხმაა სამოქალაქო საზოგადოებაზე. მე ასევე მჯერა, რომ ეს თავდასხმაა აშშ-ს ინსტიტუტზე, რომელიც მათი დამსაქმებელია. თუკი ეს მომავალ მოვლენებზე მიანიშნებს, აშკარაა, რომ ქართული ოცნების მთავრობა სწრაფად ეშვება რუსული სტილის ავტორიტარიზმში. მთავრობამ საშუალება უნდა მისცეს მკვლევრებს, საკუთარი სამუშაო შურისძიების შიშის გარეშე შეასრულონ. ჩვენი MEGOBARI აქტი საქართველოში დასჯის მათ, ვინც კანონის უზენაესობის პრინციპს არღვევს", — ვკითხულობთ განცხადებაში.

ეთო ბუზიაშვილი და სოფო გელავა ამერიკულ კვლევით ორგანიზაციაში, დეზინფორმაციასთან ბრძოლის პროგრამაში მუშაობენ. მკვლევრების სახლები საპარლამენტო არჩევნებამდე ორი დღით ადრე, 24 ოქტომბერს, ფინანსთა სამინისტროს საგამოძიებო სამსახურმა გაჩხრიკა.

29 ოქტომბერს გაირკვა, რომ ორივე კვლევარს შეზღუდული აქვს საბანკო ანგარიშებზე წვდომა.