26 ოქტომბერს ჩატარებულ საპარლამენტო არჩევნებს ცესკოს კომისიის გარდა, უპრეცედენტო რაოდენობის მოხალისეც აკვირდებოდა. მოქალაქეთა მობილიზაცია არჩევნების მოსალოდნელმა გაყალბებამ და უსაფრთხო, ფარული საარჩევნო პროცესის საბოტაჟის მცდელობების თავიდან არიდების სურვილმა გამოიწვია.

მიუხედავად იმისა, რომ საქართველოს ევროპული არჩევანის დასაცავად საარჩევნო უბნებზე ბევრი დამკვირვებელი იყო მობილიზებული, 26 ოქტომბერს მათ მიმართ უხეში დამოკიდებულების, ფიზიკური ძალადობის, მარკირების პროცედურის არჩატარების, არჩევნების გაყალბების მრავალი ფაქტი ვიხილეთ.

სწორედ ამიტომ, სოციალურ ქსელებში სამოქალაქო ინიციატივით დაიწყო კამპანია #მევნახეგაყალბება, რომლის საშუალებითაც დამკვირვებლები თუ საკუთარ საარჩევნო უბანზე დარღვევების მომსწრე ადამიანები გაყალბების შესახებ ინფორმაციას ავრცელებენ.

თუ შენც ნახე გაყალბება, შეგიძლია Facebook-ზე პოსტი გამოაქვეყნო და ჰეშტეგი #მევნახეგაყალბება დაურთო. ინფორმაციის გაზიარებით საქართველოში დემოკრატიული პოლიტიკური ფონის შექმნაში როლს შეასრულებ და საპარლამენტო არჩევნების არალეგიტიმურად ცნობაშიც შეიტან წვლილს.