პარლამენტის თავმჯდომარე შალვა პაპუაშვილი პრეზიდენტ სალომე ზურაბიშვილს მანიპულაციაში ადანაშაულებს. ამის შესახებ მან ქართული ოცნების ოფისში გამართულ ბრიფინგზე განაცხადა. პაპუაშვილი ირწმუნება, რომ პრეზიდენტის ეჭვი არჩევნებზე აპარატურით მანიპულაციასთან დაკავშირებით, ტყუილი და ცილისწამებაა. პარლამენტის თავმჯდომარე აცხადებს, რომ საქართველოს პრეზიდენტი ოპოზიციასთან ერთად ქვეყნის არევის საქმეშია ჩართული.

"გუშინ, ქალბატონმა სალომემ პრეზიდენტის სასახლიდან თქვა, რომ აპარატურით მანიპულაცია მოხდა, რაც ჩვეულებრივი ტყუილია. როცა პრეზიდენტის სასახლიდან ხდება დეზინფორმაციის გავრცელება იმისთვის, რომ ადამიანები შეცდომაში შეიყვანონ და მათ ემოციებზე ითამაშონ, ეს რა თქმა უნდა, გაუგონარი ამბავია და ხედავთ, რომ ქალბატონი სალომე პირდაპირ ჩართულია იმ სცენარში, რასაც ქვეყნის არევა ჰქვია ოპოზიციასთან ერთად. ჩვენ გვესმოდა დუბლირებული სიები, რომ აპარატი სხვის ხმებს ათვლიდა „ქართულ ოცნებას“, მონიშნული იყო ბიულეტენები - არცერთი ეს ბრალდება სიმართლეს არ შეესაბამება", — განაცხადა შალვა პაპუაშვილმა.

პარლამენტის თავმჯდომარე ამბობს, რომ აპარატურასთან დაკავშირებით, ამერიკულმა კომპანიამ, რომელიც ამისთვის წინასწარ იყო შერჩეული, აუდიტი ჩაატარა და არანაირი შეუსაბამობა აპარატურასთან დაკავშირებით არ ყოფილა.

მისივე თქმით, მმართველი გუნდის წინასწარმეტყველება იმასთან დაკავშირებით, რომ ოპოზიცია ემზადებოდა არა არჩევნებისთვის, არამედ არჩევნების მეორე დღისთვის გამართლდა.

"უკვე ნათელია არჩევნების შედეგები. თითქმის 900 ათასი ხმით „ქართულმა ოცნებამ“ აჯობა შემდეგ პარტიას, რომელიც ამ არჩევნებში მეორე ადგილზეა. ეს არის ქართველი ხალხის დიდი გამარჯვება, რომელმაც ფაქტობრივად გაიმეორა ის ნაბიჯი, რომელიც ხალხმა 2012 წელს გადადგა. გაუსწორა რა თვალი იმ რისკებსა და საფრთხეებს, რომელიც 2012 წლის არჩევნების წინ რეალობა იყო და მოიცილა ეს საფრთხეები, ხოლო ამ არჩევნებზე იყო იმის რისკი, რომ განმეორდებოდა. დიდი იმედი მართალია არა, მაგრამ გულის კუნჭულში მქონდა იმედი, რომ 2020 წლის მსგავსად არ მომიწევდა გამოსვლა და ტყუილების მხილება, მაგრამ ჩვენი წინასწარმეტყველება გამართლდა იმასთან დაკავშირებით, რომ ოპოზიცია ემზადებოდა არა არჩევნებისთვის, არამედ არჩევნების მეორე დღისთვის. ოპოზიცია და რამდენიმე მათთან დაკავშირებული არასამთავრობო ორგანიზაცია, მთელი ეს პერიოდი ამით იყვნენ დაკავებული და გამართლდა ის, რაც ჩვენ ვთქვით; გამართლა ის, რომ მათ არ სურთ აღიარონ ხალხის ნება და გამართლდა ის, რომ ისინი არ აპირებენ მიღონ ის მანდატი, რომელიც მათ ხალხმა გადასცა; 2012 წელს რამდენიმე დღე დასჭირდათ, რომ ეღიარებინათ მარცხი. 2016 წელს რამდენიმე კვირა დასჭირდათ რომ ეღიარებინათ მარცხი, 2020 წელს არ აღიარეს და რამდენიმე თვე დასჭირდათ, რომ ეღიარებინათ მარცხი და ახლაც იმავე მდინარეში შევიდნენ, თუმცა რა თქმა უნდა, აქაც იგივე აღიარება მოუწევთ", — აცხადებს პარლამენტის თავმჯდომარე.