პოლიტიკოსთა ქონებასა და საქმიანობის მკვლევარი ორგანიზაცია პოლიტმრიცხველი ქართული ოცნების საპატიო თავმჯდომარის, ბიძინა ივანიშვილისა და მისი მეუღლის, ეკატერინე ხვედელიძის სახელზე არსებული უძრავი ქონებების ჩამონათვალს აქვეყნებს საქართველოსა და რუსეთში.

მათი ინფორმაციით, ივანიშვილსა და მის ცოლს 22 უძრავი ქონება აქვს საქართველოსა და რუსეთში, რომელთა ფართობი 1000-დან 8 000 კვ/მ-დეა.

ამას გარდა, ივანიშვილის კომპანიებს საქართველოში 403 მოქმედი და 70 ყოფილი უძრავი ქონება აქვს.

პოლიტმრიცხველი წერს, რომ თავისუფლების მონიტორის 2020 წელს გამოქვეყნებული ჟურნალისტური გამოძიების მიხედვით, ბიძინა ივანიშვილის ოფშორული კომპანიების მიერ დაფუძნებული კომპანიები საქართველოში 500-ზე მეტ მიწის ნაკვეთს ფლობდა იმ დროისთვის, ჯამური ფართით — დაახლოებით 1600 ჰექტარი. ამის შემდეგ ქონების ნაწილი ივანიშვილმა საქველმოქმედო ფონდ ქართუს საკუთრებაში გადაიტანა, ნაწილი კი გაასხვისა, გააჩუქა. მსგავსი სქემით ფლობს ბიძინა ივანიშვილი საცხოვრებელ სახლს აბასთუმანში და ბიზნეს-ცენტრს — თბილისში. მაგალითად, ბიძინა ივანიშვილს იჯარით აქვს აღებული შპს ბიზნეს ცენტრისგან ბიზნეს ცენტრი თბილისში. შპს ბიზნეს ცენტრის-ის 100% წილს ფლობს საქველმოქმედო ფონდი ქართუ. ფონდ ქართუს დამფუძნებელია სს ქართუ ჯგუფი, რომელსაც, თავის მხრივ, ფლობს 3 ოფშორული კომპანია: 1. კრისტა ინვესტმენტ ლიმიტედი; 2. სარგანს ლიმიტედი და 3. ტარპან მენეჯმენტ ლიმიტედი ქართუ ბანკის ვებგვერდზე კი ატვირთულია დოკუმენტი, რომელიც ადასტურებს, რომ სს ქართუ ჯგუფის ბენეფიციარი მფლობელი ბიძინა ივანიშვილის შვილი, უტა ივანიშვილია .

Forbes-ის 2012 წლის სტატიის მიხედვით, ივანიშვილის საკუთრებაშია დაახლოებით 1 მილიარდი დოლარის ღირებულების ხელოვნების ნიმუშები, მათ შორისაა: დამიენ ჰირსტის, როი ლიხტენშტეინის ნამუშევრები, ასევე, პიკასოს დორა მაარი კატით. 2021 წელს ბიძინა ივანიშვილმა განაცხადა, რომ ფერწერული ტილოების ნაწილი გაყიდა და რომ გეგმავდა დარჩენილი ნაწილის გაყიდვასაც.

თავისუფლების მონიტორის 2020 წელს გამოქვეყნებული ჟურნალისტური გამოძიების მიხედვით, ბიძინა ივანიშვილი ბიზნეს საქმიანობას საქართველოში იმ დროისთვის სულ მცირე 13 ოფშორული კომპანიით ახორციელებდა და ამ ოფშორული კომპანიებით მას საქართველოში 100-ზე მეტი ფირმა ჰქონდა რეგისტრირებული. მათ შორის არის სს ქართუ ბანკი, რომლის მფლობელია ფონდი ქართუ და რომლის წმინდა მოგებამ 2023 წელს 35,666,000 ლარი შეადგინა.

საქართველოსა და რუსეთში ივანიშვილების ოჯახის უძრავი ქონების ნუსხა ასე გამოყურება:

ჭორვილა (2006 წ) – 2,145 კვ.მ.;

ჭორვილა (2023 წ) – 1,360 კვ.მ, 2 ნაგებობა, საერთო ფართი 320 კვ.მ.;

ჭორვილა (2023 წ) — 79,896 კვ.მ და 10 ნაგებობა საერთო ფართით 9,621 კვ.მ.;

ჭორვილა (2023 წ) — 40,004 კვ.მ.;

ჭორვილა (2023 წ) — 2,545 კვ.მ.;

ჭორვილა (2023 წ) — 19,116 კვ.მ.;

ჭორვილა (2023 წ) — 2,560 კვ.მ.;

საგურამო (2000 წ) — 5,500 კვ.მ.;

თბილისი (2011 წ) — 116 კვ.მ.;

ჭორვილა (2023 წ) — 271 კვ.მ.;

საირხე (2007 წ) — 1,601 კვ.მ.;

საირხე (2007 წ) — 4,082 კვ.მ.;

ჭორვილა (2007 წ) — 3, 929 კვ.მ, 2 ნაგებობა საერთო ფართით 261.5 კვ.მ.;

მოსკოვი (2024 წ) — 6,700 კვ.მ.;

მოსკოვი (2024 წ) — 4,347 კვ.მ.;

მოსკოვი (2024 წ) — 1,060 კვ.მ.;

მოსკოვი (2024 წ) — 4,500 კვ.მ.;

მოსკოვი (2024 წ) - 2,070 კვ.მ.;

მოსკოვი (2024 წ) – 7,000 კვ.მ.;

მოსკოვი (2024 წ) - 614 კვ.მ.;

მოსკოვი (2024 წ) — 795.60 კვ.მ.

25 ოქტომბერს, Bloomberg-ის მონაცემებით, ბიძინა ივანიშვილი მილიარდერების რეიტინგში 394-ეა და მისი ქონება 7.52 მლრდ დოლარია.