შეგახსენებთ 9 ანდაზას, რომლებშიც ქართული ოცნება გვაცხოვრებს.

1. ავი ძაღლი არც თვითონ შეჭამს, არც სხვას აჭმევსო

ქართული ოცნების მმართველობის პერიოდში ქვეყნის განვითარებისთვის საჭირო რესურსები და ძალაუფლება, რომ მათ ხელშია ყველამ ვიცით. აგერ უკვე, მეთორმეტე წელი იწურება და არც თავად იყენებენ რესურსებს, არც სხვებს აძლევენ სივრცეს ინოვაციებისა და პროგრესისთვის და ვართ ესე, სტაგნაციაში.

2. ამღვრეულ წყალში თევზს ადვილად იჭერენ

ეს ანდაზა არაჩვეულებრივად ერგება იმ ქაოსს, რომელშიც ქართული ოცნება გვაცხოვრებს. იწვევენ არეულობას, რითაც შემდეგ თვითონვე სარგებლობენ. კარგად ასამღვრევად კი, კონსპირაციის თეორიებსა და პოლარიზაციას იყენებენ.

3. ფიცი მწამს, ბოლო მაკვირვებს

ისე, ამათგან აღარაფერი გვაკვირვებს. ერთს, რომ იძახიან და მეორეს აკეთებენ, აი მაგ მირაჟში ვცხოვრობთ წლებია უკვე. დიდზე აქვთ დატანილი ევროკავშირის ვარსკვლავები პლაკატზე და სინამდვილეში რუსეთში მიგვაქანებენ. ამით, ნამდვილად, მამლის ქურდის მდგომარეობაში იგდებენ თავს.

4. კაი კაცს ბევრი ეპატიჟება, ცუდს – არავინო

ეს ანდაზა პირდაპირი მნიშვნელობითაც აკვდება ზოგზოგიერთს. მე ცოტას შევცვლიდი იმიტომ, რომ ეგ ზოგზოგიერთი მაინც დადის აქეთ-იქით შეხვედრებზე. ვფიქრობ, უფრო დამკვდარი ვერსიაა: კაი კაცს ბევრი ეპატიჟება, ცუდს – უარესებიო.

5. სხვა სხვისა ომსა ბრძენია

ირონიულად ნათქვამი ეს ოთხ სიტყვიანი ანდაზა არაჩვეულებრივად ერგება დღევანდელი მთავრობის არაკომპეტენტურობასა და მათ უტიფარ განცხადებებს მსოფლიოში მიმდინარე პროცესებზე. ერთი რიჟვაძე აღმოჩნდა, ვინც თქვა, მე არ ვიცი, დარგის ექსპერტს მიმართეთო.

6. ერთი დამპალი ვაშლი ერთ კალათა ვაშლს დაალპობსო

ეს ანდაზა კარგად აღწერს მოღალატე ადამიანს, რომელმაც გარშემო სხვა ადამიანებიც მოღალატეებად აქცია. ერთ დროს ვინც იყო საამაყო ფეხბურთელი, საამაყო მომღერალი, საამაყო მწერალი და ა.შ., ახლა საამაყოს მაგივრად მოღალატის სტატუსს ატარებენ.

7. გამშველებელს მეტი მოხვდებაო

ამ ანდაზით, უბრალოდ, ბოდიში მინდა მოვუხადო ჩვენი ქვეყნის ყველა იმ მეგობარს, ვისაც დეპოლარიზაციის მცდელობისას მმართველი პარტიის ლანძღვა მოხვედრიათ. მათ მეტი ხვდებათ, თუ ნაკლები მაგაზე შეგვიძლია ვიდავოთ, მაგრამ დაუმსახურებლად რომ ხვდებათ ეგ უთუოა.

8. ცა და მიწა იქცეოდა, ტურა ქორწილს მართავდაო

ქოცები უკრაინაში სოლიდარობის გამოსაცხადებლად ერთხელაც ვერ ჩავიდნენ, მაგრამ ამერიკაში კერძო ფრენებით დადიან და გორდონ რამზის გაკეთებულ საჭმელს მიირთმევენ, ბიუჯეტის ხარჯზე, სხვათა შორის. შეგვიძლია ამ მასშტაბებზეც არ გავიდეთ და ლოკალურად გავიხსენოთ. ჯერ მარტო ის რად ღირს, სასამართლო სისტემა თავზე რომ ჩამოგვექცა და მურუსიძე ხოხობს აფრთხიალებდა ალაზანზედ.

9. რასაც თვალს შეაჩვევ, საშიში აღარ გეჩვენებაო

ამ სამწუხარო რეალობაში დიდი ხანია ვცხოვრობთ. წლებია თვალი შევაჩვიეთ ყველა იმ უბედურებასა და ხიფათს, რასაც ამ მთავრობამ გადაგვყარა. ჩვენს ამჟამინდელ, ფსევდო სიმშვიდით შეფუთულ, საშიშ, ცხოვრებას ეს ანდაზა იდეალურად ერგება.

თუ ფიქრობ, რომ ეს მოცემულობა შესაცვლელია, გახსოვდეს: თუ გინდა გეშველოს, ხელი უნდა გაანძრიო.