2024 წლის 14 ოქტომბერს სტრასბურგში გამართულ შეხვედრაზე, ევროპის საბჭოს კონგრესის ბიურომ მიიღო გადაწყვეტილება, რომ 47-ე სესიაზე, რომელიც 15-17 ოქტომბერს გაიმართება, საქართველოში არსებული ვითარების შესახებ გადაუდებელი დებატები გამართოს. ამის შესახებ ინფორმაცია ევროპული საბჭოს ვებგვერდზე ვრცელდება.

გავრცელებულ ინფორმაციაში ვკითხულობთ, რომ საქართველოში დემოკრატიული უკუსვლისა და ადამიანის უფლებების შესუსტების აშკარა ნიშნების გამო, დებატები სტრასბურგში ხუთშაბათს, 17 ოქტომბერს, გაიმართება და დეკლარაციის მიღებით დასრულდება.

დეკლარაციის დრაფტში კონგრესი კიდევ ერთხელ მოუწოდებს საქართველოს ხელისუფლებას გაიწვიოს ადამიანის უფლებების შემლახავი კანონები და თავი შეიკავოს ნებისმიერი ქმედებისგან, რომელიც ხელს შეუწყობს საზოგადოების შემდგომ პოლარიზაციას, საფრთხეს შეუქმნის პოლიტიკურ პლურალიზმს, დაარღვევს ადამიანის უფლებებს ან ძირს უთხრის დემოკრატიის საფუძვლებს, რაც საზიანო იქნება ადგილობრივი თვითმმართველობისთვის საქართველოში.

საქართველო უნდა დაუბრუნდეს დემოკრატიული კონსოლიდაციის გზას და დაამტკიცოს თავისი ერთგულება დემოკრატიული პრინციპებისა და ადამიანის უფლებებისადმი, — ვკითხულობთ ევროპის საბჭოს კონგრესის დეკლარაციის სამუშაო ვარიანტში.

ევროპის საბჭოს ადგილობრივ და რეგიონულ ხელისუფალთა კონგრესი პან-ევროპული პოლიტიკური კრებაა, რომელიც 200 000-ზე მეტი ხელისუფლების 612 წარმომადგენელს აერთიანებს 46 ევროპული ქვეყნიდან. კონგრესის დანიშნულებაა დემოკრატიის მხარდაჭერა ადგილობრივ და რეგიონულ დონეზე, ადგილობრივი და რეგიონული მთავრობების შესაძლებლობების გაუმჯობესება და ხელისუფლების თვითმმართველობების გაძლიერება.