რუსი პრენკერი, ლექსუსი რუსთავი 2-თან ინტერვიუში ამბობს, რომ უკრაინის შს მინისტრის სახელით ნამდვილად ესაუბრა საქართველოს შს მინისტრ გიორგი მღებრიშვილს მიხეილ სააკაშვილის ექსტრადიციაზე. ლექსუსის თქმით, ის მზადაა ჩანაწერის ავთენტურობის დასადგენად ექსპერტიზაზე გადაიგზავნოს:

"მას არ გაკვირვებია ჩვენი ზარი და გვითხრა კიდეც რით შეეძლო დაგვხმარებოდა. ჩვენც ვუთხარით რითაც შეეძლო. შემდეგ იყო ეს საუბარი ჩვენს შორის. რაღაც მომენტში ღელავდა, რაც მდგომარეობდა იმაში, იყო თუ არა უფლებამოსილი ასეთი სტრატეგიული გადაწყვეტილება მიეღო. თუ იტყოდა - მოახდინეთ დეპორტაცია, ეს იქნებოდა ერთპიროვნული გადაწყვეტილება. სჭირდებოდა კონსულტაცია და გაივლიდა კიდეც თქვენს პრემიერთან. როგორც კი მიიღო მითითება, დარეკა და გვითხრა არ გამოაძევოთ სააკაშვილიო."

საქმე ეხება უკრაინულ მედიაში გავრცელებულ აუდიო ჩანაწერს, სადაც, სავარაუდოდ, გიორგი მღებრიშვილი მიხეილ სააკაშვილის ექსტრადიციაზე საუბრობს და მას უცენზურო სიტყვებით მოიხსენიებს.

შინაგან საქმეთა სამინისტრო უარყოფს, რომ აღნიშნული საუბარი ნამდვილად შედგა. უწყების პოზიციას იზიარებს საპარლამენტო უმრავლესობაც. დეპუტატის, მამუკა მდინარაძის თქმით, ასეთი კავშირები ღია სატელეფონო ხაზით არ დგება, ჩანაწერის ავთენტურობაზე სეროზულად საუბარი არ შეიძლება და შესაბამისად მის შინაარსს მნიშვნელობა არ აქვს.

რაც შეეხება ოპოზიციურ პარტიებს, ისინი მიიჩნევენ, რომ ჩანაწერით კიდევ ერთხელ დადასტურდა, რომ მიხეილ სააკაშვილის მიმართ ნამდვილად პოლიტიკური დევნა მიმდინარეობს. ერთიანი ნაციონალური მოძრაობა ჩანაწერის ავთენტურობის შესამოწმებლად საერთაშორისო უწყებებისთვის მიმართვას გეგმავს.

ვინ არის რუსი პრენკერი ლექსუსი?

რამდენიმე წელია ლექსუსი, თავის პარტნიორ ვოვანთან ერთად პოპ ვარსკვლავებს, საჯარო ფიგურებს და პრეზიდენტებსაც კი სატელეფონო ზარით ასულელებს. რუსული მედიასაშუალება Meduza-ს ცნობით, მათი საქმიანობა რატომღაც მუდმივად ემსახურება რუსეთის ხელისუფლების ინტერესებს. მაგალითად, 2016 წლის მარტში ვოვანმა და ლექსუსმა ნადია სავჩენკოს წერილი გადასცეს, რომელიც თითქოს უკრაინის პრეზიდენტის ადმინისტრაციის მიერ იყო გამოგზავნილი. წერილი სავჩენკოს შიმშილობის შეწყვეტისკენ მოუწოდებდა. წერილის ავთენტურობაში დარწმუნებული არა მხოლოდ სავჩენკო, არამედ მისი ადვოკატებიც იყვნენ. ერთ-ერთმა ადვოკატმა პრენკერებს რუსული უსაფრთხოების სამსახურებთან კავშირში დასდო ბრალი, თუმცა პრენკერებმა კრემლთან თანამშრომლობა უარყვეს.