ოქტომბერი მკერდის კიბოზე ცნობიერების ამაღლების თვეა. ამის აღსანიშნავად, The Office-ის მსახიობმა, ჯენა ფიშერმა, მკერდის კიბოს დამარცხების პირადი გამოცდილება გაგვიზიარა. მსახიობმა პოსტი ინსტაგრამის გვერდზე გამოაქვეყნა და მის განვლილ გზაზე, დიაგნოზის დადგენიდან კიბოს დამარცხებამდე, დეტალურად მოგვიყვა.

"ოქტომბერი მკერდის კიბოზე ცნობიერების ამაღლების თვეა. ვერასდროს წარმოვიდგენდი, რომ მსგავსი განცხადების გაკეთება მომიწევდა, მაგრამ რას ვიზამთ... დეკემბერში პირველი სტადიის მკერდის კიბო დამიდგინდა. ოპერაციისა და ქიმიო თერაპიის წყალობით კი, სრულიად გამოვჯანმრთელდი." — წერს მსახიობი თავის ინსტაგრამ გვერდზე და პოსტს სურათებს ურთავს, რომელშიც მისი განვლილი გზა უფრო დეტალურადაა აღწერილი.

"ამ პოსტს რამდენიმე მიზეზით ვწერ: 1. მზად ვარ პარიკი გადავაგდო; 2. მინდა მამოგრაფიის გაკეთება შეგახსენოთ; 3. მინდა გავამხნეო ქალები, რომლებიც ამ დიაგნოზს ებრძვიან."

ჯენა აღნიშნავს, რომ კიბოსთან ბრძოლის პროცესში მის დროულად აღმოჩენას უდიდესი როლი აქვს.

ამიტომ, ჯენა მოგვიწოდებს, გავიკეთოთ მამოგრაფია დროულად და სისტემატიურად.